وروستی
په میدان وردګو کې د اقليمي بدلون نړيواله اونۍ ولمانځل شوه
۱۴۴۵کال
د ربیع الثاني ۶مه
نېټه/میدان وردګ
د میدان وردګو ولایت د چاپېریال ساتنې ریاست له خوا د اقلیمي
بدلون نړۍواله اونۍ د (راتلونکي اقلیمي ثبات
لپاره د افکارو تړون) ترعنوان لاندې د حضرت عاصم (رض) خصوصي لیسې په همکارۍ،
د اړوندو دولتي ادارو استازو، زده کوونکو او خبریالانو په گډون ولمانځل شوه.
د میدان وردګو ولایت د چاپېریال ساتنې رییس مولوي الله محمد
ذاکر ګډونوالو ته د ښه راغلاست ترڅنګ د چاپیریال ساتنې او اقلیمی بدلون په اړه هراړخیزه
وینا وکړه او د چاپیریال ساتنه یې د ټولنې د ټولو وگړو دیني، ایماني او وجداني
دنده اومسٶلیت وباله او پر گډونوالو یې غږ وکړ چې چاپیریالي مسایلو جدي پاملرنه وکړي.
د ولایت مقام په استازیتوب د اقتصادي چارو کارپوه عبدالقیوم
شهباز وینا وکړه او د اقلیم بدلون یې یو ستر چاپیریالي گواښ وباله نوموړی وویل: د
نړۍ د نورو هېوادونو ترڅنګ په افغانستان کې د اقلیمي بدلون ستونزه هم شته ده د سیلابونو
راوتل، د تودوخې درجی لوړوالی، وچکالي او د اوبو کمښت په چاپېریال او اقلیم باندې
تاثیرات لري، نوموړي د دغه بدلون د مخنیوي لپاره د وسایلو او اسبابو څخه په ګټې اخیستنې،
د نفتو، ګازو او ذغالو پر ځای د لمریزې برښنا په استفادې او د اوبو پر مدیریت ټینګار
وکړ.
همدارنگه د اجندا سره سم ددې ولایت د ملي رادیو تلویزیون
مسوول احسان الله احسان د اقلیمی بدلون په اړه وینا وکړه او په دې برخه کې یې د
رسنیو په مسولیتونو باندې خبرې وکړې. نوموړي یادونه وکړه چې د چاپیریال ساتنې او
اقلیمي بدلون د ثبات په اړه به لازم نشرات ولري ترڅو د ټولنې ټول وگړي له چاپیریالي
مسایلو خبر شي.
د ارشاد، حج او اوقافواستازي مولوي محمد شیرین مظهري د
اسلامي ارشاداتو او احکامو په رڼا کې د چاپیریال ساتنې په هکله هر اړخیزې خبرې وکړې
او د اسلام له نظره یې چاپیریال ساتنه، غږیزه ککړتیا، اقلیمي بدلون سره مبارزه، د
اوبو اهمیت، او د ځنگلونو ساتنه او پالنه یې د ټولنې د ټولو خلکو مکلفیت او مسٶلیت
وباله.
ورپسې د حضرت عاصم خصوصي لیسې استاد وحیدالله د اقلیمي
بدلون له وجې د طبیعي پیښو د زیاتیدو په اړه گډنوالو ته لازم معلومات ورکړل او اقلیمي
بدلون یې ستر چاپیریالي گواښ یادکړ.
د غونډې په پای کې د یادې لیسې د زده کونکو له لوري د چاپیریال
د ککړتیا او اقلیمي بدلون د ناوړه اغیزو په اړه تمثیلي پارچه وړاندې شوه او غونډه
د دعایې په ویلو سره پای ته ورسیده.