وروستی
د هواککړتیا راکمولو او تدابیري پلانونو د تطبیق په تړاو د کابل ښار د مختلفو اصنافو له مسوولینو سره غونډه وشوه
۱۴۴۵کال
د ربیع الثاني ۲۱مه/
کابل
د چاپېریال ساتنې ملي ادارې له خوا د ژمي په موسم کې د کابل
ښار د هواککړتیا راکمولو او تدابیري پلانونو د تطبیق په هکله د مختلفو اصنافو له
مسوولینو سره مشورتي غونډه ترسره شوه.
غونډه د قران عظیم الشان مبارکو آیتونو په تلاوت پیل شوه او
ورپسې د دې ادارې د طبیعي میراثونو د ساتنې رئیس حامد صافي د هواککړتیا د لاملونو
او راکمولو په تړاو خبرې وکړې او سپارښتنه یې وکړه چې د پراختیایي پروژو د تطبیق
او هر ډول فعالیتونو د ترسره کولو پر وخت چاپېریالي اصولو ته جدي پاملرنه وشي او
موږ ټول باید په ګډه همغږۍ او همکارۍ د هواککړتیا راکمولو لپاره جدي هلې ځلې وکړو.
د غونډې په لړ کې د دې ادارې د نظارت او تفتیش ریاست د
صنعتي تاسیساتو د څارنې آمر انجنیر طوفان جبران د هواککړتیا راکمولو او مخنیوي په
تړاو د چاپېریال ساتنې ملي ادارې د تدابیري پلانونو په هکله هر اړخیز معلوماتي
پرزنټیشن وړاندې کړ.
د کابل ښار د کسبګرو او اصنافو اتحادیې استازي وویل: د کابل
ښار اکثره نانوایانې، د ودونو هوټلونه، رستورانتونه، د لامبو حوضونه او نور
فعالیتونه له ګازو څخه استفاده کوي او ډیر کم فعالیتونه چې د ډبرو له سکرو څخه
استفاده کوي، د دود د تصفیې په فلټرونو سمبال دي.
نوموړي ژمنه وکړه چې د چاپېریال ساتنې ملي ادارې سره د
هواککړتیا په راکمولو کې همکار دي او د مخنیوي لپاره به یې جدي هلې ځلې کوي.
د یادولو وړ ده چې د چاپېریال ساتنې ملي ادارې د هواککړتیا
راکمولو او مخنیوي په برخه کې لنډمهاله او اوږدمهال تدابیري پلانونه چمتو کړي او د
تطبیق لپاره یې د اړوندو ادارو په همغږۍ جدي هلې ځلې پیل کړي.
هغه فابریکې او فعالیتونو چې په خپلو ورځنیو چارو کې د
چاپېریالي اصولو او مقرراتو څخه سرغړونه وکړي د قانون منګولو ته به وسپارل شي.
د چاپېریال ساتنې ملي اداره له ټولو هېوادوالو غواړي چې
چاپېریال ساتنه خپل ملي او ایماني مسوولیت وګڼي؛ د هوا، اوبو او خاورې ککړتیا په
مخنیوي کې له دې ادارې سره دوامداره همکاري وکړي.