وروستی
د چاپېريال ساتنې ملي اداره کې د کيمياوي او زهري موادو د مديريت لومړنی واحد پرانېستل شو
د ( د کيمياوي سمي موادو د تنظيم په موخه د تلپاتې بنسټيزې پراختيا ظرفيت لوړونه ) تر عنوان د کيمياوي موادو د پروژې لومړنی ورکشاپ د چاپېريال ساتنې ملي ادارې د پاليسۍ او نړيوالو اړيکو معين ښاغلي ادريس مليار، په افغانستان کې د ملګرو ملتونو د چاپېريال ساتنې پروګرام استازي، د ذيربطو وزارتونو او ادارو استازو او د پوهنتون د استادانو په ګډون د يادې ادارې د بند امير د غونډو په تالار کې رسما پرانېستل شو. په پيل کې ښاغلي مليار د کيمياوي موادو په برخه کې يې د دې پروژې پرانېستل مهم وګڼل او ويې ويل: د هغو کنوانسينونو له ډلې چې دا اداره ورسره اړيکه لري، پنځه کنوانسينونه يې د کيمياوي موادو د مديريت سره مرتبط دي. په همدې اساس د امورو د مخکې تګ لپاره د يو واحد درلودل اړين ګڼل کېږي. د چاپېريال ساتنې ملي ادارې د پاليسۍ او نړيوالو اړيکو معين د دې ورکشاپ موخه د يادې پروژې په هکله عامه پوهاوی وګڼه او په خپلو خبرو کې يې وويل: د پروژې او د اړوندو موضوعاتو د مخکې تګ لپاره به، د کيمياوي موادو د مديريت ملي کمیټه جوړه شي ترڅو دا کميټه وشي کولی د پروژې په تصاميمو کې موږ سره همکاري وکړي. همدارنګه په دې ورکشاپ کې په افغانستان کې د ملګرو ملتونو د چاپېريال ساتنې پروګرام مسوول د دې پروژې د فعاليت، د ملګرو ملتونو د چاپېريال ساتنې همغږي کوونکي رحمت الله رفيع د کيمياوي تړونليکونو په اړه او د ملګرو ملتونو د چاپېريال ساتنې دفتر ارشدې تخنيکي مشاورې سعيدې ګوهر خپل پرېزنټېشنونه وړاندې کړل. د يادونې وړ ده چې د دې ورکشاپ ګډنوالو د دې پروژې د مختلفو پړاونو په هکله خپل نظريات هم بيان کړل.