وروستی
د هوا ککړتیا د راکمولو او مخنیوي پنځه کلن پلان د تطبیق په موخه، د حمامونو له مالکینو سره غونډه وشوه
د چاپېریال ساتنې ملي ادارې مسلکي معین، انجنیر عزت الله صدیقي په مشرۍ، د هوا ککړتیا د راکمولو او مخنیوي پنځه کلن پلان د تطبیق د څرنګوالي په تړاو د کابل ښاروالۍ د چاپېریالي روغتیا ساتنې رئیس، د پیشه ورانو اتحادیې رئیس، د ۲۲ ناحیو معاونینو، د کابل ښار د ټولو حمامونو او سقاوو مالکینو په ګډون نن د تلې په ۲۸مه نېټه، د دې ادارې د کول حشمت خان د غونډو په تالار کې ناسته ترسره شوه. د غونډې په پيل کې ښاغلي صدیقي ګډونوالو ته ښه راغلاست ووایه او د هوا ککړتیا د لاملونو او مخنیوي په اړه یې مفصل معلومات ورکړل، زیاته یې کړه: د هوا ککړتیا د راکمولو او مخنیوي لپاره باید ټول لاس په کار شو، نوموړي د حمامونو او سقاوو له مالکینو وغوښتل چې د سونګ سیسټمونو ته دې فلترونو نصب او یا دې ګازي کړي. ورپسې د چاپېریالي چارو د څارنې او پلټنې رئیس، انجنیر نیک محمد د هوا ککړتیا د را کمولو او مخنیوي پنځه کلن پلان د تطبیق او د دې ادارې د چاپېریالي چارو پلټونکو د فعالیت د څرنګوالي، د حمامونو د مالکینو او کارکوونکو د مکلفیتونو په اړه، ګډونوالو ته معلوماتي پرزینټیشن وړاندې کړ. همدا راز د کابل ښاروالۍ د چاپېریالي روغتیا ساتنې رئیس، انجنیر حسن غلامي، پیشه ورانو اتحاديې رئیس او د کابل ښار د حمامونو او سقاوو مسوول، د هوا ککړتیا د راکمولو او مخنیوي، تدابیري پلانونو او شته ستونزو په اړه ویناوې وکړې او خپل وړاندیزونه یې له مسوولینو سره شریک کړل. د غونډې په پای کې د چاپېریال ساتنې ملي ادارې مسلکي معین د هوا ککړتیا د راکمولو او مخنیوي پنځه کلن پلان د ښه تطبیق په موخه، اړونده مسوولینو ته لارښوونه وکړه چې د کابل ښار د هوا ککړتیا د را کمولو لپاره دې جدي تدابیر ونیول شي، په چاپېریالي لارښودونو دې بیا کتنه وشي او د نغدي جریمو په څرنګوالي او څومره والي کې دې د خلکو نظرونه و اوډل شي، د هوا ککړتیا راکمولو او مخنیوي پنځه کلن پلان دې د کابل ښاروالۍ له ټولو ناحیو سره شریک شي، د حمامونو مالکین دې خپل سونګ سیسټم ګازي او یا هم فلترونه نصب کړي؛ همدا راز د حمامونو مالکینو ته یوه میاشت ورکړل شو؛ ترڅو د هوا ککړتیا د راکمولو لپاره دې جدي تدابیر ونیسي. د سرغړونې په صورت کې به له نغدي جریمو سره مخ او عدلي او قضایي ارګانونو ته به ور و پېژندل شي. د کابل ښار د حمامونو مالیکینو ژمنه وکړه چې د هوا ککړتیا را کمولو لپاره به جدي تدابیر نیسي او له چاپېریال ساتنې ملي ادارې او اړونده ارګانونو څخه یې د همکارۍ غوښتنه وکړه.