وروستی
په افغانستان کې د غرني پړانګ او ايکو سيستم د ساتنې او ګواښونو د مخنيوي پروژې، لومړنی تطبيقي ورکشاپ ترسره شو
د غرني پړانګ د نړیوالې ورځې د رارسېدو سره په افغانستان کې د واورين پړانګ د ساتنې او د ايکو سيستم د ګواښونو د مخنيوي پروژې لومړنی تطبيقي ورکشاپ، د چاپېريال ساتنې ملي ادارې عمومي رئيس شاه زمان ميوندي په مشرۍ او په افغنستان کې د ملګرو ملتونو د پراختیايي پروګرام (UNDP) مرستيال ناپيليون ناوارو، د وحشي_ژويو د ساتنې موسسې (WCS) استازي، د اړوندو وزارتونو او ادارو استازو او د پوهنتون استادانو په ګډون د روان کال د تلې په ۳۰مه نېټه د چاپېريال ساتنې ملي ادارې د بند امير د غونډو په تالار کې ترسره شو. د چاپېريال ساتنې ملي ادارې عمومي رئيس، شاه زمان میوندي په خپله پرانېسته وينا کې د هغو ملي او نړيوالو همکارانو او اړوندو ادارو څخه مننه وکړه چې د دې پروژې په طرحه او ډيزاين کې يې همکاري کړې ده. ښاغلي ميوندي خوښي څرګنده کړه چې ياده پروژه اوس د پلي کېدو په حال کې او ويې ويل: افغانستان د اقليمي بدلون او وحشي ژويو د ورکېدو په برخه کې زيان منونکی دی او يادونه يې وکړه چې ښې مالي سرچينې په دې برخه کې شتون لري، خو له بده مرغه چې له دې سرچينو څخه په هغه اندازه چې موږ ورته اړتيا لرو ګټه مو ترې نه ده اخيستې. د چاپېريال ساتنې ملي ادارې عمومي رئيس د خپلو خبرو په ترڅ کې وويل: موږ بايد خپلې انګېزې او ظرفيتونه لوړ کړو ترڅو وکولای شو له دې سرچينو او فرصتونو څخه د خپل هېواد د ژوند بڼو او وحشي ژويو د ساتنې لپاره په ښه ډول ګټه پورته کړو. نوموړي د دې پروژې د تطبيق اساسي موخه په افغانستان کې د غرني پړانګ ساتنه وګڼله او ويې ويل: د ورته پروژو پلي کېدل کولی شي چې د ښکار او د وحشي ژويو د غيرقانوني تجارت د مخنيوي، له طبيعت او ايکوسيستم څخه د ساتنې او د ساتل شويو سيمو د مديريت په برخو کې په نړيواله کچه زموږ د کړو ژمنو د عملي کولو لپاره د جدي ګامونو د اخيستلو څرګندونه وکړي. ورپسې د کرنې، اوبولګولو او مالدارۍ وزارت استازي سيد رحمان زيارمل د دې پروژې د اهميت او ارزښت او په افغانستان کې د ملګرو ملتونو د پراختيايي پروګرام مرستيال ناپليون ناوارو د دې پروژې د پلي کېدو د څرنګوالي په اړه خبرې وکړې او همدرانګه په افغانستان کې د وحشي ژويو د ساتنې موسسې (WCS) استازي مجتبی بشيري او د ملګرو ملتونو د پراختيايي پروګرام (UNDP) استازي احمد جمشيد خوشبين د دې پروژې د ساختار، موخو، پايلو، چارچوکاټ، تنظيم او پلي کېدو په اړه خپل پرېزنټېشنونه وړاندې کړل. د ورکشاپ په ترڅ کې ګډونوالو د دې پروژې د لاښه پلي کېدو په تړاو خپل نظريات او وړانديزونه مطرح کړل. د يادونې وړ ده چې ياده پروژه به د بدخشان په واخان سيمه کې (چې د غرنیو پړانګانو اوسېدنځای دی) د نړيوالو مالي آسانتیاوو (GEF) په مالي ملاتړ او د وحشي ژويو د ساتنې موسسې (WCS) له خوا د چاپېريال ساتنې ملي ادارې په مستقيمې څارنې سره تر راتلونکو درې کلونو په موده کې پلي شي.