وروستی
د وحشي ژوو نړۍوالې ورځې په مناسبت مطبوعاتي اعلامیه
د
2013 کال د ډسمبر په 20مه نیټه د ملګرو ملتونو عمومي اسمبلۍ لخوا د وحشي ژوو نړیواله
ورځ تصویب شوه او پریکړه وشوه چې د مارچ دریمه به هر کال په نړۍواله کچه د وحشي
ژوو نړیوالې ورځې په توګه لمانځل کیږي. د مارچ دریمه هغه ورځ ده چې په 1973 کال کې
د سایټیز کنوانسیون تصویب شو. دا تړون د وحشي ژوو د مختلفو انواعو د ساتنې لپاره
له مهمو نړیوالو سندونو څخه دی او د دې تړون د احکامو له مخې د وحشي ژوو هر ډول
تجارت باید د وحشي ژوو نسلونو د ګواښ او په طبیعت کې د هغوی د له منځه تللو لامل
نه شي. له نېکه مرغه افغانستان د دغه تړون غړی دی.
د چاپېریال ساتنې ملي ادارې د وحشي ژوو د ساتنې په برخه کې
لاندې فعالیتونه ترسره کړي دي:
- د ۱۴۹ ډوله
وحشي ژوو مطالعه، ارزونه او په سور لیست کې یې شاملول.
- د ښکار د مخنیوي
په تړاو د افغانستان اسلامي امارت عالي مقام ۱۱۴ ګڼه
(۱۰/۲/۱۴۴۴نېټې)
حکم پلي کول.
- د قاچاقبرانو له منګولو د 383 مارغانو او 14
وحشي ژوو آزادول.
- د وحشي ژوو
او بوټو نړۍوالې سوداګرۍ تګلارې چمتو کول.
- د ناقانونه
تجارت د مخنیوي، د وحشي ژوو نړیوال تجارت د تنظیم او د هیواد ملي عوایدو د پیاوړتيا
په موخه متقاضیانو ته د چاپېریال قانون او وحشي ژوو او بوټو نړۍوال تجارت د
طرزالعمل د اصولو په پام کې نیولو سره د ۳۶ سایټیزجوازونو ویشل.
- د وحشي ژوو
په تړاو د خلکو د عامه پوهاوي کچې لوړولو په موخه د ژوند بڼو نړۍوالو ورځو
مطبوعاتي اعلامیو خپرول.
- د مرغانو او
وحشي ژوو د پېر او پلور بازارونو څارنه.
- د وحشي ژوو د
ساتنې، د ښکار او قاچاق د مخنیوي په اړه د تبلیغاتي موادو چمتو کول.
- د وحشي ژوو د
ساتنې په موخه د ساتل شوو سیمو اعلانول.
وحشي ژوي د انساني ټولنو په وده او پرمختګ کې خورا مثبت او
مهم رول لري. له کومو ګواښونو او فشارونو سره چې وحشي ژوي مخ دي، داسې حد ته رسیدلي
دي چې که په ملي او نړۍواله کچه ورته پاملرنه و نه شي؛ ژوند بڼې به د ورکېدو له ګواښ
سره مخ شي او راتلونکی نسل به د وحشي ژوو د ډیرو ډولونو له شتون څخه محروم شي. د
وحشي ژوو له لاسه ورکول د بشري ژوند د دوام او راتلونکي لپاره د خطر زنګ دی. الله
تعالی ټولو وحشي ژوو ته د ژوند کولو حق ورکړی؛ نو موږ باید ځان ته اجازه ور نه کړو
چې د خدای تعالی په کار کې مداخله وکړو او د هغه مخلوق له تباهۍ سره مخ کړو. موږ
باید د الهي احکامو مطابق د وحشي ژوو او چاپېریال ساتنې لپاره هڅې وکړو.
موږ هیله مند یو چې د افغانستان نجیب ملت به د وحشي ژوو په
ارزښت پوه شوی وي، د وحشي ژوو او ژوند بڼو له ناقانونه سوداګرۍ او بې رحمانه ښکار څخه
باید ډډه وکړي او ډیری وحشي ژوي چې دا مهال یې نسل د ورکېدا له ګواښ سره مخ دی، د
هغو ساتنه باید وشي.
والسلام