وروستی
د نايتروجن د تلپاتې مديريت په برخه کې د ملګرو ملتونو نړيوال کمپاين پرانېستل شو
د چاپېريال ساتنې ملي ادارې د پاليسۍ او نړيوالو اړيکو معين ادريس مليار د افغانستان په استازيتوب د نايټتروجن د تلپاتې مديريت په برخه کې د ملګرو ملتونو نړيوال کمپاين د روان کال د لړم د مياشتې په لومړۍ او دويمه نېټه چې د اکتوبر د مياشتې ۲۳ مې او ۲۴ مې نېټې سره يې سمون درلود او د سريلانکا هېواد په کولمبو کې ترسره شو ګډون وکړ. په دې ناسته کې د ملګرو ملتونو د چاپېريال ساتنې پروګرام (UNEP) اجرائيوي مرستيالې آغلې جويس او د ۳۱ هېوادونو استازو ګډون درلود او په مختلفو اقتصادي په ځانګړې توګه د کرنې سکتور د فعاليتونو په برخه کې يې د نايتروجنو څخه د ډېرې ګټې اخيستنې، د هوا د ککړتيا د ډېروالي، اقليمي بدلون، د اوبو ککړتيا او د ژوند بڼو د کمښت په هکله يې خبرې وکړې. ښاغلي مليار د افغانستان به استازيتوب په دې ناسته کې وينا وکړه او ويې ويل: افغانستان يو مخ پر ودې هېواد دی د چې شاوخوا څلورو لسيزو راهيسې په ډول ډول د چاپېريالي ننګونو او ويجاړتياو سره مخامخ دی، د افغانستان خلک او دولت د يوې آرامه او سالمې راتلونکې جوړولو ته بارومنده دي چې په دې کې د کيمياوي موادو سالم مديريت او د هوا د ککړتيا سره مبارزه هم برخه لري. د چاپېريال ساتنې ملي ادارې د پاليسۍ او نړیوالو اړيکو معين د خپلو خبرو په ترڅ کې وويل: موږ پر چاپېريال او د انساني روغتيا د نايتروجنو منفي اغيزو په اړه پوهېږو، دا چې افغانستان يو کرنيز هېواد دی نو زموږ ډېری بزګران د خپل ورځيني ژوند د دوام لپاره به کرنه کې دې برخې ته اړتيا لري، خو بايد د دې موادو د سالم مديريت لپاره نه يوازې په افغانستان کې بلکې د ټولې نړۍ په کچه پاملرنه وشي. موږ په دې برخه کې ځينې مقررې او کړنلارې ترتيب کړې دي، لکه د هوا د ککړتيا د کمښت او مخينوي پلان. سربېره پر دې په دې وروستيو کې د کيمياوي موادو تلپاتې مديريت په موخه مو د کيمياوي او زهري موادو واحد مديريت او د کيمياوي موادو د مديريت ملي کميټه رامنځ ته کړې. ښاغلي مليار په دې ناسته کې ټينګار وکړ چې موږ د د هواد ککړتيا د کمښت او د کيمياوي موادو او نايټروجنو د ښه مديريت په برخو کې د خپلو لاسته راوړنو د ساتنې او پرمختګ په پار د نړيوالو مرستندويانو فني او مالي مرستو او ملاتړ ته اړتيا لرو.