د ګډوالو مرغانو نړۍ‌والې ورځې په تړاو

د چاپېریال ساتنې ملي ادارې مطبوعاتي اعلامیه
مرغان د ایکوسیسټم او چاپېریال له مهمو او اساسي اجزاوو څخه دي؛ نو دې اهمیت ته په کتو د ګډوالو مارغانو په هکله د خلکو د عامه پوهاوي کچې لوړولو په موخه د ثور میاشتې دریمه اونۍ د ګډوالو مرغانو نړۍوالې ورځې په توګه نومول شوې او په نړۍواله کچه لمانځل کیږي.
ګډوال مارغان د ټولو هېوادونو له ګډو طبیعي مراثونو څخه دي چې په وچو دښتو، غرنیزو سیمو، ساحلونو، سیندونو او ډنډونو کې اوسيږي او د خوندي سیمو موندلو، د نسل د تولید او اقلیمي بدلون له امله له یوه ځای څخه بل ځای او یا له یوه هېواده بل هېواد ته ګډوال کیږي.
د مرغانو کډوالي هغه منظم موسمي سفرونه دي چې د مرغانو مختلف ډولونه یې د خوړو او خوندي ځای موندلو لپاره له یوه ځای نه بل ځای ته کوي. له همدې امله یاد مارغان د کډوالۍ پر مهال خوندي ځایونو ته اړتیا لري چې تغذیه شي او نسل تولید کړي؛ نو هر هېواد باید ګډوالو مرغانو ته مناسب او خوندي ځایونه چمتو کړي.
د ژوند بڼو نړۍوالو کنوانسیونونو ارزونې ښیي چې د اقلیمي بدلون ناوړه اغېزو له امله د ګډوالو مرغانو ډیر پټنځایونه له منځه تللي او یا هم د ویجاړیدو په حال کې دي چې په ټوله کې اقلیمي بدلون د ژوند بڼو لپاره لوی ګواښ دی.
د کډوالو مارغانو د ساتنې په تړاو نړۍوال اهمیت ته په کتو چې اساسي موخه یې د کډوالو مارغانو خصوصاً هغه ډولونه چې نسل یې د ورکېدو له ګواښ سره مخ دی، د هغو هېوادونو په قلمرو کې چې ګډوال مرغان یې پر فضا تیریږي، د عدلي او قضایي ارګانونو په شمول یې ټول وګړي د یادو مارغانو په ساتنه کې مکلف دي او باید د ساتنې لپاره یې پوره هڅې او بشپړه همکاري وکړي.
د چاپېریال ساتنې ملي اداره ټولو قدرمنو هېوادوالو ته سپارښتنه کوي چې د افغانستان اسلامي امارت د هدایاتو او احکامو مطابق په ټول افغانستان کې د وحشي ژوو  سوداګري، پېر او پلور، انتقال، قاچاق او ښکار ممنوع دی. د مارغانو او وحشي ژوو په ساتنه کې باید ټول هېوادوال خپل دیني او ملي مسوولیت ادا کړي او د بې‌رحمانه ښکار، پېر او پلور او ناقانونه تجارت څخه دې ډډه وکړي.
والسلام

د چاپېريال ساتنې ملي اداره

May 11, 2024