د چاپېریال ساتنې ملي ادارې رهبرۍ د (GEF) نړیوالي شورا له سکرتریت او ددې شورا له دایمي غړي سره مشورتي غونډه وکړه.

کابل/ ٢٩/ذوالقعده ١٤٤٥
د چاپېریال ساتني ملي ادارې عمومي رئیس حافظ عزیز الرحمن او ددې ادارې متخصصینو په انلاین توګه د چاپېریال ساتنې نړیوالي تسهیلاتي شورا له سکرتریت او ددې شورا له دایمې غړي ماهر عبدالرحیم سره غونډه وکړه.

په دې انلاین مشورتي غونډه کي د افغانستان ترڅنګ پاکستان، عراق، لبنان، یمن، سوریې او اردن هیوادونو اړونده مسوولینو او استازو هم برخه اخیستې وه.
ماهر عبدالرحیم د يادو اوو هیوادونو په استازیتوب د GEF نړیوالي شورا دایمي غړیتوب لري.

د چاپېریال ساتنې ملي ادارې عمومي رئیس د اقلیمي بدلون پروژې چي دامهال په تعلیق کي اچول شوي د محیط زیست نړیوالي تسهیلاتي شورا غړي ماهر عبدالرحیم سره په بحث کي مطرح کړې او غوښتنه یې وکړه چي دغه پروژې دي ښاغلي عبدالرحیم د یادي شورا په غونډه کي مطرح او ملاتړ یې وکړي.

په دې تعلیق شویو پروژو کې د ۱۰ میلیونو ډالرو په ارزښت د ځمکې د تخریب څخه د مخنیوي، د ځنګلونو د ساتنې او بیا احیاکولو مدیریت او له همدې لاري د سیمه ییزو خلکو د ژوند د پیاوړتیا پروژه، د ۲۰ میلیونو ډالرو په ارزښت د اقلیمي بدلون سره د اوبو د سازګاره مدیریت پروژه، د ١٠ میلیونو ډالرو په ارزښت د تخریب شویو ایکوسیستمونو د بيارغوني پروژه او همدارنګه د ١.١٦ میلیونو امریکايي ډالرو په ارزښت د نورستان ملي پارک ددوامداره مدیریت پروژه شامله ده چي له ښاغلي عبدالرحیم سره ورباندي بحث او خبري وشوې.

د چاپېریال ساتني ملې ادارې رهبرۍ ټینګار وکړ دا پروژې د افغانستان د خلکو حق دی چي د تیرو دریو کلونو راهیسي په تعلیق اچول شوي او ګټه یې یواځي محلي ټولنو او د افغانستان هغه قشر ته رسیږي چي د اقلیم بدلون له منفي پایلو څخه رنځ وړي.
ښاغلي حافظ وویل د يادي غونډې څخه یې موخه داده، د GEF نړیواله شورا چې ټاکل شوې د روان کال د جون له ١٧ څخه تر ٢٠ نېټې پورې په امريکا کې دایره شي او غونډه وکړي، د افغانستان ځنډول شوي پروژې تر بحث لاندي ونیسي او له تعلیق څخه وویستل شي.
نوموړي زياته کړه محیط زیستي مسایل باید په هیڅ صورت سیاسي نشي او هیله مو داده چي د GEF اړوند تعلیق شوې پروژې ژر تر ژره پیل شي.
د چاپېریال ساتني ملي ادارې مشرتابه هوډ څرګنډ کړ چي د افغانستان اسلامي امارت د ټولو نړیوالو چاپېریالي کنواسینونو تعهداتو ته ژمن دی او غوښتنه یې له نړیوالو بنسټونو، ډونرانو او مرستندویه موسساتو څخه داده چي په هیواد کې د بشپړ امنیت په تامین سره کولی شې پروژې تطبیق او عملي کړي.

د GEF نړیوالي شورا دایمي غړي ښاغلي ماهر عبدالرحیم د غونډي د ګډونوالو د نظریاتو، وړاندیزونو او غوښتنو تر اورېدو وروسته ژمنه وکړه چي دی به هڅه وکړي ددې هېوادونو په استازولۍ د وړاندیز شويو پروژو تائید ترلاسه کړي.

نوموړي وويل دا مهال په ځانګړې توګه افغانستان د اقلیمي بدلونونو د ناوړو پایلو قرباني دی او خلک يې د سختو ګواښونو سره مخ دي، ماهر عبدالرحیم د افغانستان د چاپېریال ساتنې ملي ادارې عمومي رئیس ته ډاډ ورکړ چي بشري مسایل له سياسي مسايلو سره هیڅ تړاو نه لري، د محیط زیست او اقلیمي بدلون اړوند تعلیق شوې پروژې ددې هېواد د خلکو حق دی او دی به یې په درست ډول دفاع وکړي ترڅو عملا یې کار پیل کړل شي.

Jun 8, 2024