د چاپېریالي اصولو د تطبیق په موخه د ۳۷ تولیدي شرکتونو او فابریکو له فعالیتونو څارنه وشوه

۱۴۴۵کال د ذی الحجې ۱نېټه/ کابل
د چاپېریال ساتنې ملي ادارې مفتشینو د تېرې اونۍ په ترڅ کې د کابل پلچرخي صنعتي پارکونو کې د تولیدي فابریکو او شرکتونو د فعالیتونو د چاپېریالي وضعیت د ارزونې په موخه د ۳۷مختلفو فابریکو او تولیدي شرکتونو (د وسپنې د ویلې کولو فابریکو، د نکلي او پلاسکو لوښو تولیدي فابریکې، د پلاستیکي توکو تولیدي شرکتونو، د غیر الکولي نوشابو، جوس او معدني اوبو تولیدي شرکتونو، د پلاستیکي بوټانو او څپلکو تولیدي شرکتونو، وینځونکو توکو او انټي سپتیک تولیدي شرکتونو له فعالیتونو څخه نظارت کړی.

د چاپېریالي چارو مفتشینو د تولیدي فابریکو او شرکتونو مسوولینو ته د چاپېریال قانون، مقرراتو او طرزالعملونو په هکله معلومات او پوهاوی ورکړ او سپارښتنه یې ورته وکړه چې خپل فعالیتونه د چاپېریالي اصولو مطابق عیار او ترسره کړي.
د څارنې په ترڅ کې د فابریکو او تولیدي شرکتونو مسوولینو ته موجوده چاپېریالي ستونزې په نښه شوې او لیکلې ژمنې ترې واخیستل شوې چې موجوده ستونزې به حل کوي.
د چاپېریال ساتنې ملي اداره د هواککړتیا راکمولو او مخنیوي په موخه د هواککړوونکو سرچینو ټولو فعالیتونو مسوولینو ته سپارښته کوي چې خپل فعالیتونه د چاپېریالي اصولو مطابق ترسره کړي.

هغه فابریکې او تولیدي شرکتونه چې د دود د تصفیې فلټرونه یې غیر فعال، ویجاړ او یا هم د اوبو، هوا او خاورې د ککړتیا لامل وګرځي، له قانوني چلند سره به مخ شي.
د چاپېریال ساتنې ملي ادارې نظارتي ټیمونه په مرکز او ولایتونو کې له هر ډول فعالیتونو او هواککړوونکو سرچینو څخه په دوامداره او جدي توګه نظارت کوي او څوک چې چاپېریالي اصول نه پلي کوي قانوني چلند ورسره کوي.

Jun 8, 2024