د چاپېریال ساتنې ملي ادارې رهبرۍ د اذربایجان له سفیر سره وکتل

۱۴۴۵کال د ذی الحجې ۳مه/کابل
د چاپېریال ساتنې ملي ادارې عمومي رئیس حافظ عزیزالرحمن نن سه شنبه د ۱۴۰۳کال د غبرګولي په ۲۱مه نېټه په خپل کاري دفتر کې د اذربایجان له سفیر ښاغلي الهام محمدوف او د یاد سفارت له سلاکار ښاغلي تاریل اسماعیلوف سره وکتل.
په دې لیدنه کې د چاپېریال ساتنې ملي ادارې مسلکي او پالیسي معین ډاکټر زین العابدین عابد، د اقلیمي بدلون، نړۍوالو اړیکو او پلان رئیسانو او مسوولینو هم حضور درلود.

په پیل کې د چاپېریال ساتنې ملي ادارې عمومي رئیس حافظ عزیزالرحمن د اذربایجان سفیر هرکلی وکړ او د مختلفو چاپېریالي موضوعاتو په هکله یې ورسره بحث او خبرې وکړې.
ده وویل: چاپېریال یوه مهمه او نړۍواله موضوع ده او دې اهمیت ته په کتو د چاپېریال ساتنې ملي اداره چې دا مهال د ۱۶نړۍوالو چاپېریالي کنوانسیونونو غړیتوب لري، د هغو ټولو تعهداتو ته ژمنه ده؛ په داسې حال کې چې نړۍوال د چاپېریالي مسایلو په برخه کې له افغانستان سره همکاري نه کوي. ښاغلي حافظ وویل: موږ د نړۍوالو چاپېریالي کنوانسیونو تعهداتو ته ژمن او هیله مند یو چې نړۍوال هم له افغانستان سره تعامل وکړي.

د چاپېریال ساتنې ملي ادارې عمومي رئیس وویل: افغانستان د اقلیمي بدلون له ناوړه اغېزو څخه زیات اغېزمن شوی چې په هېواد کې د خطرناکو سېلابونو راتلل یو له عمده لاملونو څخه دي. نوموړي د اذربایجان له سفیر څخه غوښتنه وکړه چې د COP29 کنفرانس چې سږ کال په اذربایجان هېواد کې جوړیږي باید د افغانستان پلاوي د ګډون لپاره هڅې وکړي؛ ترڅو په دې نړۍوال کنفرانس کې د افغانانو غږ پورته شي.

ښاغلي حافظ وړاندیز وکړ چې موږ غواړو د اذربایجان هیواد سره د چاپېریالي موضوعاتو، د تکنالوژیو او تجاربو د انتقال او ظرفیت لوړونې په برخه کې ګډې همکارۍ ولرو.

د چاپېریال ساتنې ملي ادارې مسلکي او پالیسي معین ډاکټر زین العابدین عابد وویل چې له فتحې وروسته موږ تر ډیره داخلي چاپېریالي موضوعات حل کړي یوازې بیروني موضوعات پاتې دي چې هغه د سیاسي ملحوظاتو له امله ځنډیدلي چې ان شاالله هغه به هم حل شي. نوموړي ټینګار وکړ چې افغانستان ته باید په COP29 غونډه کې د ګډون بلنه ورکړل شي؛ ترڅو موږ وکولای شو خپل غږ تر نړۍوالو ورسوو.

د اذربایجان سفیر د چاپېریال ساتنې ملي ادارې له رهبرۍ مننه وکړه او زیاته یې کړه چې د افغانستان او اذربایجان تر منځ له پخوا څخه دوستانه او تاریخي اړیکې وې او موږ غواړو چې د ا.ا.ا سره مو لا اړیکې دوستانه او پیاوړې شي.
 ښاغلي محمدوف ژمنه وکړه چې د COP29 غونډه کې به د افغانستان پلاوي د ګډون لپاره هلې ځلې کوي او ستاسو وړاندیزونه او نظرونه به له خپلو چارواکو سره شریکوي.

Jun 10, 2024