د لسګونو فابریکو او تولیدي شرکتونو څخه د هواککړتیا راکمولو او مخنیوي په موخه نظارت ترسره شو

۱۴۴۶کال د ربیع الاول۱۴مه/کابل
د چاپېریال ساتنې ملي ادارې نظارتي ټیمونو له خوا کابل ښار کې د هواککړتیا راکمولو، مخنیوي او چاپېریالي اصولو د تطبیق په موخه د کابل څرخي‌پله او ده‌سبز صنعتي پارکونو کې  د ۶۲ مختلفو فابریکو او تولیدي شرکتونو : (د وسپنې او المونیم ویلې کولو فابریکو، د وسپنه‌یې او جستې پایپونو، خوراکي توکو، پلاستيکي پایپونو، پلاستیکي توکو، وینځونکو توکو، صابون جوړولو، پلاستيکي څپلکو، اکسیجن، رنګ، نوشابو، معدني اوبو، درملو او فوم تولیدي شرکتونو) له فعالیتونو او چاپېریالي وضعیت څارنه او ارزونه ترسره شوه.
د نظارت په ترڅ کې د فابریکو او تولیدي شرکتونو مسوولینو ته چاپېریالي ستونزې او نېمګړتیاوې ور وښودل شوې او د اصلاح په موخه ورته د چاپېریال قانون، مقرراتو او طرزالعملونو په هکله عامه پوهاوی ورکړل شو.

د چاپېریال ساتنې ملي اداره د هواککړتیا راکمولو او مخنیوي په موخه د هواککړوونکو سرچینو او ټولو فعالیتونو مسوولینو ته سپارښته کوي چې خپل فعالیتونه د چاپېریالي اصولو مطابق عیار  او ترسره کړي.
هغه فابریکې او تولیدي شرکتونه چې د دود د تصفیې فلټرونه یې غیر فعال، ویجاړ او یا هم د اوبو، هوا او خاورې د ککړتیا لامل وګرځي، له قانوني چلند سره به مخ شي.
د یادونې وړ ده چې د چاپېریال ساتنې ملي ادارې نظارتي ټیمونه په مرکز او ولایتونو کې د هواککړوونکو سرچینو څخه په دوامداره توګه څارنه کوي او هغه څوک چې له چاپېریالي اصولو څخه سرغړونه کوي د قانون منګولو ته یې سپاري.

Sep 17, 2024