د کابل ښار مختلفو ناحیو کې د ۶۷ فابریکو، تولیدي شرکتونو او اصنافو له فعالیتونو څارنه وشوه

۱۴۴۶کال د جمادي الثاني ۳مه/کابل
د چاپېریال ساتنې ملي ادارې مرکزي مفتشینو لخوا د هواککړوونکو سرچینو څخه د نظارتي لړیو پر دوام د تېرې یوې اونۍ په لړ کې د کابل ښار جمعه محمدي او څرخي‌پله صنعتي پارکونو؛ ۴مې او ۱۷ ناحیې اړوند سیمو کې د چاپېریالي اصولو د تطبیق په موخه د ۴۶ مختلفو فعالیتونو : (درمل جوړولو، ویځونکو توکو، پلاستیکي توکو، وسپنې ویلې کولو، پلاسکو لوښو او (A4)کاغذ د پروسس فابریکو؛ د بخار دیګونو، تشناب کاغذ، خوراکي توکو، پلاستیکي لوښو، پلاستیکي بوټانو، پلاستیک او ربړونو، لبنیاتو، پي وي سي، بریښنایي توکو، تعمیراټي ډبرو، رنګ، فوم او پمپرونو تولیدي شرکتونو او همدا راز د جلدي ناروغیو روغتون، مخابراتي انتنونو، د تیلو ټانګونو، هوټلونو او حمامونو) د فعالیتونو د څرنګوالي او چاپېریالي وضعیت څارنه او ارزونه وکړه.

د چاپېریالي چارو مفتشینو لخوا د څارنې په ترڅ کې د یادو فابریکو، تولیدي شرکتونو او اصنافو مسوولینو ته د اصلاح په موخه چاپېریالي ستونزې ور وښودل شوې؛ لازمې سپارښتنې ورته وشوې او همدا راز د چاپېریال قانون، مقرراتو او طرزالعملونو په هکله ورته عامه پوهاوی ورکړل شو او غوښتنه ترې وشوه چې خپل فعالیتونه د چاپېریالي اصولو او معیارونو په پام کې نیولو سره ترسره کړي.
هغه فابریکې، تولیدي شرکتونه، لوړپوړیزه ودانۍ او اصناف چې د سون‌سیسټمونو د دود د تصفیې فلټرونه یې غیر فعال، ویجاړ او یا هم غیر فعال وي، ژر تر ژه یې باید جوړ او فعال کړي، چاپېریال ساتنې ته جدي پاملرنه وکړي، د اوبو، هوا او خاورې د ککړتیا لامل باید نه‌شي.

د چاپېریال ساتنې ملي ادارې نظارتي ټیمونه شپه او ورځ په مرکز او ولایتونو کې د هواککړوونکو سرچینو (فابریکو، تولیدي شرکتونو، لوړپوړیزو ودانیو او اصنافو) له فعالیتونو څخه په دوامداره توګه څارنه کوي؛ هر هغه څوک چې له چاپېریالي اصولو څخه سرغړونه وکړي او یا هم د چاپېریال د ککړتیا لامل شي، له جدي قانوني چلند سره به مخ شي چې بیا هیڅوک د شکایت حق نه لري.

Dec 5, 2024