هلمند کې پر اوبو د اقلیمي بدلون د اغېزو تر سرلیک لاندې یو ورځنی روزنیز ورکشاپ ترسره شو

۱۴۴۶کال د جمادي الثاني ۱۰مه/ هلمند
د هلمند ولایت د چاپېریال ساتنې ریاست او TLO موسسې په همکارۍ د لښکرګاه مرکز بُست شاهي صالون کې پر اوبو د اقلیمي بدلون اغېزو تر سرليک لاندې يو ورځنی روزنيز ورکشاپ ترسره شو.
په ياد ورکشاپ کې د هلمند ولايت مقام د دفتر رئيس مولوي عبدالرحمن حذيفه، د هلمند ولایت د چاپېريال ساتنې رئيس ملا محمد عيسی حسین الله آغا، د اوبو او انرژۍ رئيس محمد یعقوب قایم، د اطلاعاتو او کلتور، ارشاد، حج او اوقافو ریاستونو، علمای کرامو، د پوهنتون استادانو، محصلینو، لښکرګاه ښاروالۍ د ګذرونو او صنفي وکیلانو، د اړوندو ادارو استازو، خبریالانو او ځوانانو ګډون کړی وو.

د ورکشاپ په لړ کې د ولایت مقام د دفتر رئیس مولوي عبدالرحمن حذيفه وويل چې په نړۍ کي د نويو ټکنالوژيو په رامنځته کيدو سره اقليمي بدلون رامنځته شو چې د افغانستان پر چاپېریال یې ناوړه اغېزې کړې دي. نوموړي زیاته کړه: باید په ټولو هڅه وکړو ترڅو د اوبو د کمښت ستونزه په مسلکي شکل مدیریت کړو او تر څنګ یې عامه ولسونو ته پوهاوی ورکړو تر څو یاده ستونزه په بشپړ ډول له ټولنې څخه ورکه شي.
د هلمند ولایت د چاپېريال ساتنې رئيس د TLO موسسې له مسؤلينو څخه مننه وکړه چې د هلمندوالو لپاره يې د يوې ګټورې موضوع په تړاو روزنیز ورکشاف جوړ او له ګډونوالو يې وغوښتل چې د ورکشاف له معلوماتو ګټه واخلي او عملي يې کړي.
همدارنګه د اوبو او انرژۍ رياست انجينر سيد عمر دوران د موضوع په اړه خبرې وکړې او ويې ويل: اقليم د انسانانو په ژوند کې يوه اساسي برخه ده او د اقليم له بدلون سره د اوبو کچه هم بدلون کوي. نوموړي زياته کړه چې په هلمند ولايت کې د تېرو دوو کلنو را پدېخوا د ځمکې لاندې اوبو کچه تر يو نیم مترو پورې را ټيټه شوې ده چې دا د اوبو د کموالي په برخه کې يوه ګواښونکې موضوع ده.

د هلمند پوهنتون د وترنرۍ پوهنځۍ استاد پوهنمل محمد امان احمدزي وويل چې اوبه د ژوند په معنا دي چې هر ژوندی موجود ورته اړتيا لري نو بايد د کم استعمال هڅه يې وکړو. نوموړي زياته کړه چې افغانستان د جغرافیایي پلوه په وچه کې راګير هيواد دی چې کوم سمندر ته لار نه لري نو بايد اوبه يې په سمه توګه مهار او مديریت سي ترڅو د اوبو له کمښت سره مخ نه شو.
د حج او اوقافو رياست په استازيتوب مولوي عبدالرحيم آغا د اسلام له نظره د چاپېريال پر پاک ساتنې او د اوبو پر سمه کارونه هر اړخيزې خبرې وکړې او له ګډونوالو يې وغوښتل چې د اوبو د کم استعمال په برخه کې خپلو کورنيو او ټولنه کې عامه پوهاوی ترسره کړي.

د کابل پوهنتون استاد او اړيکو د دفتر فعال غړي مجيب الرحمن احمدزي او هلمند پوهنتون استاد عبدالوهاب سيدي د پرګرام د موضوع سره سم خپل ترتيب شوي سمينارونه او اړوند معلومات د ګډونوالو سره شريک کړه.
د ورکشاپ په وروستيو کې په ګروپي ډول د پرګرام ګډونوالو نظرونه او وړانديزونه را ټول او وروسته په نوبت سره تشريح شول او ياد ورکشاپ ګډونوالو ته د تصديق پاڼو په ورکولو او دُعا ويلو سره پای ته ورسېده.

Dec 12, 2024