وروستی
میدان وردګو کې د نیالګیو کېنولو ملي کمپاین د یوې لويې غونډې په ترڅ کې پيل شو
۱۴۴۶کال د رمضان المبارک ۱۸مه/ میدان وردګ
د پسرلي په را رسېدو سره د نیالګیو کېنولو ملي کمپاین پر
دوام د میدان وردګو ولایت د چاپېریال ساتنې، کرنې او ښاروالۍ ریاستونو لخوا د ولایت
مقام په همغږۍ میدان ښار کې د یوې لویې غونډې په ترڅ کې د نیالګیو کېنولو ملي کمپاین
پیل شو.
په دې مراسمو کې د میدان وردګو والي قاري بختیار معاذ، مرستیال
والي حافظ سیدالرحمن، د علماوو شورای استازو، د دولتي ادارومسولینو، قومي مشرانو
او ځوانانو ګډون کړی وو.
غونډه د قرانکریم د څو مبارکو ایتونو په تلاوت سره پیل شوه
ورپسې د میدان وردګو والي قاري بختیار معاذ د ونو د اهمیت او ساتنې په اړه وینا وکړه
او ویې ویل: د نیالګیو او بوټو کېنول صدقه جاریه ده او پر ټولو ولسونو او د ښوونځیو
په زده کوونکو یې غږ وکړ چې د چاپېریال د زرغونتیا په موخه نیالګي کینوي او په اړونده
ادارو یې ټینګار وکړ چې د نیالګیو کېنولو تر کمپاین وروسته په دوامداره توګه ترې څارنه
وکړي، اوبه رسونه او پالنه یې وکړي، دغه راز یې د یادو ادارو له مسؤلینو سره د ولایت
مقام لخوا د نیالګیو د ساتنې، پالنې او اوبو رسولو برخه کې د مالي ملاتړ ژمنه هم
وکړه.
د اجنډا سره سم د میدان وردګو ولایت د چاپیریال ساتنې رئیس
مولوی الله محمد ذاکر د نیالګیو د اهمیت په اړه خبرې وکړې او زیاته یې کړه چې ونې
او بوټي نه تنها د چاپیریال په ښکلا کې رول لري بلکې د اقلیمي بدلون په تعادل، چاپیریال
په ښکلا او ساتنه او د اکسیجن په تولید کې مهم رول لري دغه راز د چاپیریال ساتنې
رئیس د غونډې په ګډونوالو غږ وکړ چې د چاپیریال د ښکلا او ساتنې لپاره په خپلو
ساحو کې نیالګي کېنوي او ساتنه او پالنه یې وکړي.
د
کمپاین پر په لړ کې د اسلام له نظره د نیالګیو کېنولو په ارزښت د علماوو شورا
استازي مولوي محمد الله احمدي، د کرنې او طبعیت له نظره د ونو او بوټو د کېنولو په
اړتیا د کرنې رئیس مولوي نیاز محمد عابد او د ښار په زرغونتیا او ښکلا کې د نیالګیو
کېنولو په رول باندې د ښاروالۍ رئیس راز محمد فاروقي هر اړخیزې خبرې وکړې او یاد
کمپاین د ( نیالګي په کېنولو سره د چاپېریال ساتنه وکړئ) تر سرلیک لاندې د نیالګیو
په کېنولو سره پیل شو ، پاتې دې نه وي چې د دې کمپاین په ترڅ کې به د اړونده ادارو
له لوري د میدان وردګو ولایت په مختلفو ساحو کې (۳۰) دیرش زره نیالګي کېنول شي.
