وروستی
لغمان کې د ښکار د مخنیوي کمپاین په ترڅ کې د یو شمېر کب نیوونکو د ښکار وسایل ضبط شول
۱۴۴۶کال د رمضان المبارک ۲۷مه/لغمان
د وحشي ژوو، کبانو او الوتونکو د بې رحمانه ښکار د مخنیوي
او د افغانستان اسلامي امارت ریاست الوزرا عالي مقام د (۱۱۴) ګڼه حکم د پلي کولو په موخه د
لغمان ولایت د چاپېریال ساتنې ریاست مسوولینو له لوري د ښکار د مخنیوي کمپاین پر
دوام د الیشنګ سیند په اوږدو کې د (ګلکاري،
ده زیارت او مشه خیلو ښکاري سیمو) کې یو شمیر چجې له منځه یوړل شوې، ښکاري وسایل یې
ضبط او ښکاریانو ته د ښکار د مخنیوي په هکله پوهاوی او لازمې سپارښتنې وشوې.
د لغمان ولایت د چاپېریال ساتنې ریاست د ښکار د مخنیوي لپاره په تیر ښکاري موسم کې
هم پراخه کمپاین ترسره کړی و او د ښکار د مخنیوي لپاره په مکرر ډول له ټولیزو او ټولنیزو
رسنیو، اعلامیو، غونډو او خبرتیاوو له لارې خلکو ته عامه پوهاوی ورکول شوی ده،
همدارنګه د ټولو ولسوالیو اړوندو همکارو ملکي او نظامي ادارو ته هم د ښکار د مخنیوي
لپاره د لازمو اجراآتو د ترسره کیدو په موخه رسمي پاڼې لیږل شوې دي، تر څو د هیواد
طبیعي سرمایه خوندي پاتې شي.
د یادونې وړ ده چې د ا.ا.ا ریاست الوزرا عالي مقام د ١١٤ ګڼه حکم په اساس ټول
افغانستان کې د وحشي ژوو، مارغانو او کبانو ښکار بند دی او که هرچا له دې امر څخه
سرغړونه وکړه د قانون منګولو ته سپارل کیږي.
