وروستی
میدان وردګو ولایت کې د نیالګیو کینولو ملي کمپاین پيل شو
۱۴۴۶کال د رمضان المبارک ۲۷مه/ میدان وردګ
د میدان ودرګو ولایت د چاپېریال ساتنې ریاست، وردګ پوهنتون
او رها موسسې په ګډه همکارۍ وردګ پوهنتون کې (د نیالګیو په کېنولو سره د چاپیریال
ساتنه وکړئ) تر شعار لاندې د نیالګیو کېنولو ملي کمپاین پیل شو.
په همدې مناسبت جوړو شوو مراسمو کې د میدان وردګو ولایت د
چاپیریال ساتنې رئیس مولوي الله محمد ذاکر، د چاپیریال ساتنې ملي ادارې د اقلیمي
بدلون ریاست کارپوهانو، د وردګ پوهنتون رئیس شیخ صفت الله حقاني، د رها موسسې استازو، د دولتي ادارو مسولینو، د
پوهنتون استادانو، محصلینو، چاپیریال ساتنې ریاست کارمندانو، قومي مشرانو او ځوانانو
ګډون کړی وو.
غونډه د قرانکریم مبارکو ایتونو په تلاوت سره پیل شوه، ورپسی
د وردګ پوهنتون رئیس شیخ صفت الله حقاني د ښه راغلاست ترڅنګ د ونو د اهمیت او ساتنې
په اړه وینا وکړه او ویې ویل: د نیالګیو او بوټو کېنول صدقه جاریه ده او پر ټولو
ولسونو او د پوهنتون په محصلینو یې غږ وکړ چې د چاپېریال د زرغونتیا په موخه نیالګي
کېنوي، ساتنه او پالنه يې وکړي ترڅو پوهنتون زرغون شي.
د چاپیریال ساتنې رئیس مولوي الله محمد ذاکر د نیالګیو د
اهمیت په اړه خبرې وکړې او نوموړي وویل: چې ونې او بوټي نه یوازې د چاپیریال په ښکلا
کې رول لري بلکې د اقلیمی بدلون په تعادل، چاپېریال ساتنې او د اکسیجن په تولید کی
مهم رول لري. ښاغلي ذاکر پر ګډونوالو غږ وکړ چې د چاپیریال د ښکلا او ساتنې لپاره
په خپلو ساحو کې نیالګي کېنوي ساتنه او پالنه یې وکړي.
د کمپاین په لړ کې د رها موسسې استازي د کرنې او طبعیت له
نظره د ونو او بوټو د کېنولو په اړتیا خبرې وکړې او د نیالګیو کینول یې په ټولنه کې
مهم وبلل، پاتې دې نه وي چې د دې کمپاین په ترڅ کې به د وردګ پوهنتون په انګړ کې ۷۰۰ نیالګي کینول شي.
