وروستی
د چاپېریال ساتنې ملي ادارې عمومي رئیس په افغانستان کې د ملګرو ملتونو د پراختیایي پروګرام له رئیس سره ولیدل
۱۴۴۶کال د ذوالقعدې ۱۰نېټه/ کابل
د چاپېریال ساتنې ملي ادارې عمومي رئیس مولوي مطیع الحق
خالص د ۱۴۰۴کال
د ثور په ۱۸مه
نېټه افغانستان کې د ملګرو ملتونو د پراختیایي پروګرام(UNDP)له
رئیس ښاغلي سټیفن سره په خپل کاري دفتر کې ولیدل.
په دې لیدنه کې د افغانستان د چاپېریالي وضعیت، اقلیمي
بدلون، چاپېریالي پروژو، د ګډې همکارۍ او همغږۍ د پیاوړتیا په تړاو بحث او خبرې
وشوې.
د چاپېریال ساتنې ملي ادارې عمومي رئیس د (UNDP) د رئیس او ورسره مل پلاوي
هرکلی وکړ او د دوی له راتګ څخه یې مننه وکړه.
د ملګرو ملتونو د پراختیایي پروګرام
(UNDP)رئیس ښاغلي سټیفن د چاپېریال ساتنې ملي ادارې
له عمومي رئیس څخه مننه وکړه او ویې ویل چې په امارتي ادارو کې دا یوازینۍ اداره
ده چې ورسره ډیره همغږي او همکاري لري.
د چاپېریال ساتنې ملي ادارې عمومي رئیس مولوي مطیع الحق
خالص په خپلو خبرو کې وویل: د چاپېریال ساتنې په برخه کې باید زموږ او (UNDP) تر منځ ستراتېژیکه همکاري پیاوړي
شي. ده وویل په ملي کچه د افغانستان د ټاکل شوې ونډې سند
NDC_2 چمتو شوی چې د ملګرو ملکتونو د اقلیم بدلون د
کنوانسیون سکرتریت ته د سپارلو په برخه کې د
UNDP همکاري اړینه ده.همدارنګه
د ادارې د کارکوونکو د ظرفیت لوړونې او د NDC_3 سند
په چمتو کولو په برخه کې (UNDP) د دې
ادارې مالي او تخنیکي ملاتړ وکړي.
ښاغلي خالص غوښتنه وکړه چې د اقلیمي بدلون سره د مبارزې په
برخه کې باید ځوانانو ته د ګډون زمینه مساعده شي، په نړۍوالو چاپېریالي غونډو
خصوصاً (COP-30) کې د
ادارې د پلاوي د ګډون لپاره هلې ځلې وشي او د تګ امکانات دي ورته برابر شي.
په دې لیدنه کې همدا راز له اقلیمي بدلون سره د سازښت په
برخه کې د نیالګیو کېنول با اهمیته وبلل شول او عمومي رئیس ټینګار وکړ چې راتلونکي
کال کې باید د نړۍوالو او ملي بنسټونو لخوا د نیالګیو کېنولو کچه درې او یا لږ تر
لږه د سږ کال په پرتله دوه برابره شي؛ ځکه چې افغانستان د اقلیمي بدلون له ناوړه
اغېزو څخه زیات اغیزمن شوی هېواد دی.
په افغانستان کې د ملګرو ملتونو د پراختیایې پروګرام (UNDP)رئیس
ښاغلي سټیفن د همکارۍ او همغږۍ په پیاوړتیا ټینګار وکړ او ویې ویل چې زموږ همکاري
محدوده نه ده، بلکې په هره برخه کې د افغانستان ملاتړ کوو او هر هغه څه مو چې په
وس کې وي خپلو هڅو او همکاریو ته به دوام ورکړو.
نوموړي زیاته کړه موږ په ټولو نړۍوالو غونډو کې د افغانستان
د ستونزو یادونه کړې او له بسپنه ورکوونکو هېوادونو څخه مو غوښتي چې چاپېریالي او
صحي موضوعات دې نه سیاسي کوي.
د لیدنې په پای کې د همکارۍ او همغږۍ په پیاوړتیا ټینګار
وشو او هوکړه وشوه چې د ذکر شويو مسایلو په هکله به تخنیکي ټیمونه خپل کار ته
ادامه ورکړي او د موجوده ستونزو د هوارولو لپاره به مناسبې د حل لارې چارې ولټوي.