وروستی
د کابل ښار صنعتي پارکونو او مرکزي ناحیو کې د (۱۱۲) فابریکو او فعالیتونو چاپېریالي ارزونه ترسره شوه
۱۴۴۶کال د ذوالقعدې ۱۳مه/ کابل
د چاپېریال ساتنې ملي ادارې مرکزي مفتشینو لخوا د فابریکو،
تولیدي شرکتونو او مختلفو اصنافو د فعالینونو د معیاري کولو، اوبو، هوا او خاورې
ککړتیا د مخنیوي او همدا راز چاپېریالي اصولو د تطبیق په پار د کابل څرخيپله
صنعتي پارکونو او مختلفو مرکزي ناحیو کې د (۱۱۲) فابریکو، تولیدي شرکتونو او
مختلفو اصنافو له فعالیتونو څارنه او ارزونه ترسره شوه.
د نظارت په لړ کې (د کرکټ وسایلو، د ډبرو سکرو د پروسس،
پلاستیکي توکو، پایپونو جوړولو، معدني اوبو، خوراکي توکو، بریښنایي وسایلو، آیسکریم،
جوس او نوشابې، څپلکو او بوټانو، یوځل مصرفه پلاستیکي توکو، د جامو وینځلو واسلین،
یخ جوړولو، شامپو او صابون جوړولو او درمل جوړولو فابریکو او تولیدي شرکتونو او
همداراز مختلفو اصنافو لکه: روغتونونو، کلینیکونو، درملتونونو، هوټلونو، د تیلو ټانکونو،
قصابیو، حمامونو، موټر وینځلو ځایونو او نانوایانو د فعالیتونو د څرنګوالي څارنه
او ارزونه وشوه؛ مسوولینو ته یې د چاپېریال قانون او چاپېریالي اصولو په هکله عامه
پوهاوی ورکړل شو؛ موجوده چاپېریالي ستونزې او نیمګړتیاوې ور وښودل شوې او د اصلاح
په موخه ورته لازمې سپارښتنې وشوې.
یادونه: د چاپېریال ساتنې ملي ادارې مفتشین په مرکز او ولایتونو
کې د هواککړوونکو سرچینو څخه په دوامداره توګه څارنه کوي او هغه فعالیتونه چې چاپېریالي
اصولو ته پاملرنه نه کوي د قانون منګولو ته سپارل کیږي؛ همدا راز هغه فابریکې او
تولیدي شرکتونه چې د دود د تصفیې فلټرونه یې غیر فعال، ویجاړ او یا هم د اوبو، هوا
او خاورې د ککړتیا لامل وګرځي، له قانوني چلند سره به مخ شي.
چاپېریال ساتنې د ټولو هېوادوالو دیني او ملي مسوولیت دی؛
راځئ چې خپل چاپېریال پاک وساتو!