وروستی
ننګرهار پوهنتون کې په (COP-30) کنفرانس کې د افغانستان د ګډون په تړاو علمي سیالي ترسره شوه
۱۴۴۶کال د ذوالقعدې ۱۵نېټه/ ننګرهار
د ننګرهار پوهنتون د حقوقو او سیاسي علومو پوهنځي له لوري د
اقلیمي بدلون(COP-30) نړۍوال
کنفرانس کې (د افغانستان د ګډون اړتیا، فرصتونه او اغېزې) تر عنوان لاندې یوه
رقابتي علمي سیالي ترسره شوه چې پکې د استادانو، متخصصینو او امارتي ادارو مسوولینو
په شمول د ورځنۍ او شپنۍ دورې محصلینو ګډون کړی وو.
یاده رقابتي سيالي د قرآن کریم د څو مبارکو آیتونو په تلاوت
پیل شوه ورپسې د ننګرهار ولایت د چاپېریال ساتنې رئيس قاري احسان الله مختار د ننګرهار
پوهنتون څخه مننه وکړه چې د محصلینو د فکري ودې لپاره يې دا ډول رقابتي سیالۍبرابره
کړې ده. نوموړي وویل: اقلیمي بدلون یو نړیوال ګواښ دی چې د افغانستان په ګډون د ټولې
نړۍ پر خلکو یې اغېز کړی، اقليمي بدلون نه یوازې د خلکو ژوند ته ګواښ دی، بلکې
کرنه یې زیانمنه کړې، پر حاصلاتو یې منفي اغېزې کړې او د هېواد اقتصاد ته یې سخت زیان
رسولی دی. ده زیاته کړه چې د نړیوالو همکاریو له لارې افغانستان کولی شي د زرغونې
انرژۍ او کرنیزو بدیلو لارو چارو پر مټ د اقلیم بدلون مدیریت په برخه کې نوې تجربې
ترلاسه کړي. دا نوښتونه به هېواد ته دا فرصت برابر کړي چې د وچکالۍ، سېلابونو او
نورو اقلیمي پېښو پر وړاندې چمتو شي، خلکو ته د کار زمینه برابره شي او چاپېریالي
فرصتونه ایجاد شي.
د ننګرهار پوهنتون د علمي چارو مرستیال مولوي احسانالله
ناصح وویل چې اقلیم بدلون یو نړېوال ګواښ دی، او زیاتره هغه هېوادونه ترې سخت زیانمن
شوي، چې د چاپېریال د ککړتیا په مخنیوي کې پاتې راغلي دي.
نوموړي زیاته کړه چې ککړتیا نه یوازې انسانان، بلکې ټول
ژوندي موجودات اغېزمن کوي، او د دې ستونزې د حل یوازینی لاره عامه پوهاوی دی. هغه ټینګار
وکړ، چې د ټولنې ګټې د عامه پوهاوي سره تړاو لري، او کله چې خلک د چاپېریال ساتنې
په اهمیت پوه شي، نو د ککړتیا د مخنیوي لپاره عملي ګامونه پورته کېږي.
د سيالۍ په لړ کې د پوهنتون د مرستيالانو ترڅنګ چې هر یو یې
پر اقلیمي بدلون خپل ارزښتناک نظریات وړاندې کړل، ۱۵ محصلینو هم خپل علمي پریزنټېشنونه وړاندې کړل.