وروستی
د اقلیمي بدلون په تړاو د چاپېریال ساتنې ملي ادارې کارکوونکو ته د ظرفیت لوړونې ورکشاپ پرانیستل شو
١٤٤٦کال د ذوالقعدې٢٠مه/ کابل
د چاپېریال ساتنې ملي ادارې د کارکوونکو د مسلکي ظرفیت لوړونې
پنځه ورځنی ورکشاپ، چې د یادې ادارې په همغږۍ او د "چاپېریال ساتنې او بشري
مرستو" (رها) موسسې په تخنیکي همکارۍ تنظیم شوی، نن یکشنبه د غوايې میاشتې په
۲۸ مه نېټه د رها موسسې په
مرکزي دفتر کې پرانیستل شو.
ورکشاپ د قرآن کریم د مبارکو آیتونو په تلاوت سره پیل شو.
ورپسې، د رها موسسې رئیس محمد یوسف حمیدیان ګډونوالو ته ښه راغلاست ووایه او د
ورکشاپ د دایریدو په اړه یې تفصیلي معلومات وړاندې کړل.
د چاپېریال ساتنې ملي ادارې عمومي رئیس، مولوي مطیعالحق
خالص د رها موسسې له مشرتابه څخه مننه وکړه چې د دې ادارې د کارکوونکو د ظرفیت لوړونې
لپاره یې یاد ورکشاپ ترتیب کړی دی.
نوموړي وویل: "د تېرو ۴۵ کلونو جګړو او ناخوالو د
افغانانو د ژوند ټولې برخې اغېزمنې کړې دي، نو موږ باید د اقلیمي بدلونونو د اغېزو
پر وړاندې چمتو اوسو او خپله مسلکي پوهه لوړه کړو."
ښاغلي خالص وویل: "زده کړه یوازې د سند اخیستو لپاره
نه ده، بلکې باید معنوي ارزښتونه او مسلکي ژمنتیا پکې په پام کې ونیول شي.
ده زیاته کړه موږ باید د الله (ج) او خپل هېواد پر وړاندې د
مسؤلیت احساس ولرو، او ترلاسه شوي معلومات په عملي ډګر کې وکاروو."
هغه له ځوانانو وغوښتل چې د پرمختګ روحیه ولري، زده کړي
معلومات نورو ته ورسوي او په خپل ژوند او کار کې ترې ګټه واخلي.
په ذکر شوي پنځه ورځني ورکشاپ کې به ګډونوالو ته د اقلیمي
بدلون، نړیوالو چوکاټونو، قوانینو، پروتوکولونو، کنوانسیونونو، د ملي او نړیوالو
بنسټونو رول، اقلیمي ارزونو، کړنلارو، نړیوالو مالي میکانیزمونو، اقلیمي حکومتولۍ،
د اقلیمي بدلون ساينسي مفاهیمو او د پروژو د مدیریت په اړه مسلکي معلومات وړاندې شي.
