وروستی
د چاپېریال ساتنې ملي ادارې عمومي رئیس د فاریاب ولایت د چاپېریال ساتنې ریاست له کارکوونکو سره وکتل
١٤٤٧کال د صفرالمظفر ١٠مه/ فاریاب
د چاپېریال ساتنې ملي ادارې عمومي رئیس مولوي مطیعالحق
خالص د خپل رسمي سفر په ترڅ کې د فاریاب ولایت د چاپېریال ساتنې ریاست له
کارکوونکو سره وکتل او د هغوی ستونزې، وړاندیزونه او د ادارې کاري وضعیت یې له نږدې
وڅیړل.
په دې ناسته کې د فاریاب د چاپېریال ساتنې رئیس حافظ محمد
اسماعیل ایوبی د ولایت چاپېریالي وضعیت، د اوبو، هوا او خاورې د ککړتیا عمده
عوامل، د ادارې د ظرفیت لوړولو اړتیاوې او د ولسي همکاریو د جلب لپاره روانې برنامې
تشریح کړې.
عمومي رئیس د چاپېریال ساتنې ریاست د کارکوونکو زحمتونو ستاینه
وکړه او د ادارې له رهبرۍ څخه یې د دوامداره ملاتړ ډاډ ورکړ. نوموړي ټینګار وکړ چې
د چاپېریال ساتنې ملي اداره به د کارکوونکو وړتیاوو لوړولو، تجهیزاتو برابرولو او
د عامه پوهاوي پروګرامونو پراخولو ته ځانګړې پاملرنه وکړي.
ښاغلي خالص له کارکوونکو وغوښتل چې خپلي دندې په ايماندارۍ
او صداقت سرته ورسوي او له هیڅ راز زحمت او ستړیا څخه دریغ ونه کړي.
د ناستې په پای کې کارکوونکو خپلې ستونزې، وړاندیزونه او غوښتنې
د ادارې له عمومي رئیس سره شریکې کړې چې د حل لپاره یې لازمې لارښوونې وشوې.