د کابل او پروان ولایتونو لپاره د اقلیمي بدلون پر وړاندې د سازګارۍ پلانونه جوړيږي

۱۴۴۷کال د صفرالمظفر ۹مه/ کابل
د چاپېريال ساتنې ملي ادارې مسلکي او پاليسي معين ډاکټر مُلا زين العابدين عابد په مشرۍ نن دوشنبه د ۱۴۰۴کال د زمري په ۱۳مه نېټه د دې ادارې د بند امیر غونډو په تالار کې له اقلیمي بدلون سره د سازښت او مبارزې په برخه د اویک (AWEC) مؤسسې په همکارۍ د کابل او پروان ولایتونو لپاره د سازګارۍ پلان پر مسودې مشورتي غونډه ترسره شوه.

په دې غونډه کې د دې ادارې د اقلیمي بدلون، د کابل او پروان ولایتونو د چاپېریال ساتنې رئیسانو، کارپوهانو ؛ د اړوندو امارتي وزارتونو او ادارو استازو ګډون کړی وو.
غونډه د قران عظیم الشان مبارکو آیتونو په تلاوت پیل شوه ورپسې د چاپېريال ساتنې ملي ادارې مسلکي او پاليسي معين ډاکټر مُلا زين العابدين عابد ګډونوالو ته ښه راغلاست ووایه او په خپلو خبرو کې یې وویل: اقلیمي بدلون یوه نړۍواله موضوع ده چې افغانستان یې په راوستو کې هیڅ ونډه نه لري؛ خو له بده مرغه د اقلیمي بدلون له ناوړه اغیزو څخه تر ټولو زیانمن هېواد دی.

ښاغلي عابد زیاته کړه چې په تېرو څو لسیزو جګړو کې ډول ډول کیمیاوي وسلې کارول شوې چې د نورو ناخوالو سربېره د افغانستان چاپېریالي وضعیت هم ډیر زیانمن کړی دی. نوموړي وویل: له اقلیمي بدلون سره د مبارزې په برخه کې سږني پسرلي کې څه باندې ۱۷میلیونه نیالګي کېنول شوي، د ځنګلونو د قطع کولو مخنیوی شوی، د ځنګولونو د بیا احیاء لپاره ډیر کار شوی، د بې کیفیته تیلو د واردولو مخه نیول شوې او دا دی اوس د کابل او پروان ولایتونو لپاره د سازګارۍ پلان مسوده چمتو شوې چې د لا بډاینې لپاره به ستاسو نظرونه او وړاندیزونه پکې و اوډل شي.
ده له ګډونوالو وغوښتل چې د سازګارۍ پلان د غني کېدو لپاره دې خپل نظرونه او وړاندیزونه له دې ادارې سره شریک کړي.

د غونډې په لړ کې د (AWEC) مؤسسې استازي له خوا د کابل او پروان ولایتونو لپاره د سازګارۍ پلان د مسودي په هکله هر اړخیز معلوماتي پرزنټېشن وړاندې کړ او له ګډونوالو یې وغوښتل چې د دې مسودې د غني کولو لپاره دې خپل نظرونه او وړاندیزونه شریک کړي.
د یادې مشورتي غونډې په پای کې ګروپي کارونه ترسره شول او د کابل او پروان ولایتونو لپاره د سازګارۍ پلان د مسودې په هکله یې هر اړخیز بحث وکړ او خپل نظرونه او وړاندیزونه یې شریک کړل.

Aug 4, 2025