وروستی
د وحشي ژوو، کبانو او مارغانو ښکار بند دی، سرغړوونکي د قانون منګولو ته سپارل کیږي
۱۴۴۷ کال د صفر ۱۱مه/لغمان-خوست
د ښکار د مخنیوي کمپاین په لړ کې د لغمان او خوست ولایتونو د چاپېریال ساتنې ریاستونو
مسوولینو له لوري مهترلام ښار کې د وطني ماهیانو پر پلور بندیز ولګیده؛ همدا راز
خوست کې یو شمېر نیول شوي مرغان آزاد شول.
د ریاست الوزراء عالي مقام حکم په اساس په ټول افغانستان کې د وحشي ژوو، مارغانو
او کبانو ښکار بند دی، د همدې حکم د تطبیق په موخه د لغمان ولایت د چاپېریال ساتنې
رئیس حاجي احمد شاه ابراهیم په مشرۍ مفتشینو له لوري د امنیتي مسؤلینو په همغږۍ
مهترلام ښار کې له یو شمېر رستورانټونو څخه د وطني ماهیانو د نه پخولو په موخه
نظارت ترسره شو.
د رستورانتونو مسؤلینو ته د ښکار د مخنیوي او طبیعي منابعو د ساتنې او اهمیت په
هکله عامه پوهاوی ورکړل شو او د وطني کبانو د پېر او پلور د مخنیوي په هکله ورته
سپارښتنې وشوې چې د رستورانتونو مسوولینو لخوا د همکارۍ ژمنه وشوه او ډاډ یې ورکړ
چې د وطني ماهیانو د نسل د ورکیدو د مخنیوي لپاره به لازم اقدامات کوي.
همدا راز د خوست ولایت د چاپېریال ساتنې رئیس قاري شریفالله مهاجر په مشرۍ نظارتي
ټیم له لوري د امنیتي ځواکونو په همکارۍ نیول شوي بېلابېل وحشي مرغان لکه زرکان،
طوطیان،کوترې او کنري د ښکاریانو له منګولو خلاص او ازاد شول.
د خوست ښار امنیتي مسؤلینو ته سپارښتنه وشوه چې د ښکار د مخنیوي په برخه کې دې
لازم اقدامات وکړي.
د یادونې وړ ده چې په ټول هېواد کې د وحشي ژوو، مارغانو او کبانو ښکار بند دی، که
هرڅوک د ښکار په تور ونیول شول د قانون منګولو ته به وسپارل شي.