وروستی
د چاپېریال ساتنې ملي ادارې مرستیال او ورسره پلاوي هلمند ته سفر وکړ او هلته یې د یاد ولایت له والي سره وکتل
١٤٤٧کال د صفرالمظفر ١٥مه/ هلمند
د چاپېریال ساتنې ملي ادارې پالیسي او مسلکي مرستیال ډاکټر
ملا زین العابدین عابد د یو رسمي سفر په ترڅ کې هلمند ولایت ته ورسېد او له هلمند
والي مولوي عبدالرحمن کندوزي سره یې وکتل.
په دې کتنه کې دواړو لورو د هېواد د چاپېریالي وضعیت ارزونې
وروستي راپور، د اقلیمي بدلون اغېزې، د روانې وچکالۍ ستونزې او د اوبو د اغېزمن مدیریت
په اړه هر اړخیز بحث او خبري وکړې.
ښاغلي عابد څرګنده کړه چې د چاپېریال د ارزونې راپور جوړونه
به د ټولو ولایتونو په کچه عملي کېږي او هلمند د ځانګړو اقلیمي شرایطو له امله پکې
ځانګړی اهمیت لري. نوموړي زیاته کړه چې د وچکالۍ د اغېزو کمول، د اوبو د مدیریت معیاري
تګلارې او د طبیعي سرچینو ساتنه د ادارې له مهمو لومړیتوبونو څخه ده.
د هلمند والي مولوي عبدالرحمن کندوزي د هلمند د چاپېریالي
وضعیت او د وچکالۍ له امله د خلکو د ستونزو یادونه وکړه او ډاډ یې ورکړ چې د ولایت
مقام به د چاپېریالي پروګرامونو په پلي کولو کې له اړوندو ادارو سره نږدې همکاري کوي.