وروستی
په پکتیا کې د سویل ختیځ زون د چاپیریالي وضعیت ارزونې مشورتي ورکشاپ رسما پیل شو
١٤٤٧کال د صفرالمظفر ٢٦مه/ پکتیا
د چاپیریال ساتنې ملي ادارې عمومي رئیس الحاج مولوي مطیعالحق
خالص او ورسره پلاوي د پکتیا ولایت مرکز ګردېز کې د سویل ختیځ زون د چاپیریالي وضعیت
د ارزونې په مشورتي ورکشاپ کې ګډون وکړ او ياد ورکشاپ يې رسما پرانیست.
دغه ورکشاپ د پکتیا ولایت د مرستیال والي، د خوست، پکتیکا،
غزني او پکتیا ولایتونو د بېلابېلو امارتي ادارو د استازو په ګډون د قرآن کریم د
مبارکو آیتونو په تلاوت سره پیل شو.
په پیل کې د پکتیا د چاپیریال ساتنې رئیس مولوي عبدالهادي
هدایت د ښه راغلاست وینا وکړه او د دې ولایت د چاپیریالي وضعیت په اړه یې خبرې وکړې.
وروسته د پکتیا ولایت مرستیال شیخ انعامالله صلاحالدین د چاپیریال ساتنې ملي
ادارې د هڅو ستاینه وکړه او له دې ادارې سره یې د پلانونو او پروګرامونو په تطبیق
کې د بشپړي همکارۍ ډاډ ورکړ.
د چاپیریال ساتنې ملي ادارې عمومي رئیس مولوي مطیعالحق
خالص د ورکشاپ د پرانيستي او د هېواد د چاپېریالي وضعیت په تړاو هر اړخیزه وینا وکړه.
نوموړي چاپیریال ساتنه د ټولو هېوادوالو ګډ ایماني او ملي مسؤلیت وباله او زیاته یې
کړه چې سالم چاپیریال د ژوند د دوام او د زرغون افغانستان لپاره حیاتي اهمیت لري.
ښاغلي خالص د طبیعي منابعو ساتنې، د اوبو د ضایع کېدو د مخنیوي،
د هوا د ککړتیا د کمولو او د اقلیمي بدلون پر وړاندې د اغېزمنو اقداماتو پر اړتیا ټینګار
وکړ. هغه وویل چې د امنیت د ټینګښت په نتیجه کې د چاپیریال د ابادۍ لپاره مناسب
شرایط رامنځته شوي او اوسمهال د افغانستان په ګوټ ګوټ کې د مهمو برنامو او پروژو
عملي کېدو ته بهتره زمینه مساعده شوې ده.
د
چاپیریال ساتنې ملي ادارې عمومي رئیس زیاته کړه افغانستان د طبیعي منابعو له پلوه
بډای هېواد دی، خو د تېرو جګړو، د نفوس زیاتوالي او د اقلیمي بدلون له امله د هوا
ککړتیا، د ځنګلونو له منځه تګ، د اوبو کموالی او د ځمکو تخریب هغه ستونزې دي چې د
خلکو پر ژوند یې منفي اغېز کړی دی.
ښاغلي
خالص د نړیوالو همکاریو او مرستو یادونه هم وکړه او ویې ویل: "افغانستان د
اقلیمي بدلون له امله ډېر زیان لیدلی، نو نړیواله ټولنه او د چاپیریال اړوند موسسې
باید له موږ سره خپلې مرستې او همکارۍ لا پیاوړې کړي، څو وکولای شو د چاپیریالي
ستونزو پر وړاندې په ګډه مبارزه وکړو."
عمومي
رئيس د رها موسسې له همکاریو څخه مننه وکړه او د
NDC سند په جوړولو کې د ټولنې د بېلابېلو قشرونو ګډون
ارزښتناک وباله.
د
ورکشاپ په دوام د رها موسسې مرستیال عزتالله صدیقي د سویل ختیځ زون د چاپیریالي
وضعیت ارزونې په تړاو جوړ شوی پرزنټېشن وړاندې کړ.
د
یادونې وړ ده چې په پکتیا ولایت کې د لومړي ځل لپاره د سویل ختیځ زون په کچه د چاپیریالي
وضعیت د ارزونې مشورتي ورکشاپ ترسره کېږي چې د دوو ورځو
لپاره به دوام ولري.