وروستی
د چاپېریال او دوامداره پراختیا تر عنوان لاندې علمي سیمینار جوړ شو
۱۴۴۷ کال د ربیع الاول ۲نېټه/ کابل
د چاپېریال ساتنې ملي ادارې او خاتم النبیین پوهنتون په ګډه
همکارۍ نن سه شنبه د ۱۴۰۴کال
د سنبلې په ۴مه
نېټه د خاتم النبیین پوهنتون د غونډو په تالار کې "د چاپېریال او دوامداره
پراختیا" تر عنوان لاندې یو ورځنی علمي سیمینار جوړ شوی و چې پکې د چاپېریال
ساتنې ملي ادارې عمومي رئیس مولوي مطيع الحق خالص، د دې ادارې یو شمېر رئیسانو او
کارپوهانو، د پوهنتون استادانو، رسنیو استازو او محصلینو ګډون کړی وو.
یاد علمي سیمینار د قران عظیم الشان مبارکو ایتونو په تلاوت
پیل شو، ورپسې د خاتم النبیین پوهنتون د حقوقو او سیاسي علومو پوهنځي رئیس ښاغلي
عبدالبصیر نبي زاده ګډونوالو ته ښه راغلاست ووایه او د چاپېریال ساتنې په برخه کې
د پوهنتونونو د رول او ونډې په تړاو هر اړخیزه وینا وکړه.
د چاپېریال ساتنې ملي ادارې عمومي رئیس مولوي مطيع الحق
خالص د افغانستان د چاپېریالي وضعیت په هکله هر اړخیزې خبرې وکړې او زیاته یې کړه
چې د تېرو څو لسیزو جګړو پر مهال د ډول، ډول ممنوعه او کیمیاوي وسلو کارولو له
امله زموږ هېوادوال ډیر زیات متضرره شوي او په مختلفو ناروغیو اخته شوي دي، له بل
خوا اقلیمي بدلون هم افغانستان ډیر زیات متضرره کړی په داسې حال کې چې افغانستان د
اقلیمي بدلون په رامنځته کولو کې هيڅ ونډه نه لري.
نوموړي وویل: د هېواد په لویو ښارونو کې په نا منظمه او غیر
پلاني توګه د ښارونو پراختیا هم ډیرې ستونزې رامنځته کړې دي چې د حل لپاره یې باید
ټول په ګډه لاس په کار شو.
ښاغلي خالص وویل: موږ د انسانانو په حیث دوامداره پراختیا
ته اړتیا لرو چې دا مو هم ضرورت او هم امانت دی، موږ باید هم خپل ضرورتونه او هم
راتلونکي نسل ته سالم چاپېریال په میراث پریږدو.
د دې ادارې عمومي رئیس له استادانو او محصلینو وغوښتل چې له
فرصت څخه اعظمي ګټه واخلي او د چاپېریال ساتنې، علمي څېړنو او د عامه پوهاوي کچې
لوړولو په برخه کې دې له امارتي ادارو سره همکاري وکړي.
د
سیمینار په لړ کې د پوهنتون د استادانو او د دې ادارې د کارپوهانو لخوا د مختلفو
چاپېریالي مسایلو په هکله هر اړخیز معلوماتي پرزنټېشنونه وړاندې شول.