وروستی
د (COP-30)کنفرانس لپاره د افغانستان د چمتووالي په هکله دریمه مشورتي غونډه وشوه
۱۴۴۷ کال د ربیع الاول ۴مه/ کابل
د چاپېریال ساتنې ملي ادارې پالیسي او مسلکي معین ډاکټر ملا
زین العابدین عابد په مشرۍ د (COP-30) نړۍوال
کنفرانس لپاره د افغانستان د چمتووالي په هکله نن پنج شنبه د ۱۴۰۴کال د سنبلې په ۶مه نېټه د دې ادارې د بند امیر
د غونډو په تالار کې د (ORD) مؤسسې
په همکارۍ دریمه مشورتي غونډه ترسره شوه.
په دې مشورتي غونډه کې د اړوندو امارتي وزارتونو، ادارو،
ملي او نړۍوالو مؤسسو استازو، متخصصینو او د پوهنتونونو استادانو په حضوري او انلاین
بڼه ګډون کړی وو.
غونډه د قرانکریم مبارکو ایتونو په تلاوت پیل شوه ورپسې د دې
ادارې د اقلیمي بدلون رئیس روح الله امین د تېرو غونډو د لاسته راوړنو په اړه خبرې
وکړې او ګډونوالو ته یې ښه راغلاست ووایه.
د چاپېریال ساتنې ملي ادارې پالیسي او مسلکي معین ډاکټر ملا
زین العابدین عابد له اقلیمي بدلون څخه د افغانستان د متضرره کېدو په اړه خبرې وکړې
او زیاته یې کړه چې افغانستان د هغه متضرره هېوادونو څخه دی چې د اقلیمي بدلون څخه
ډیر زیانمن شوی په داسې حال کې چې د تغیر اقلیم په راوستو کې هیڅ ونډه نه لري.
نوموړي وویل: د اقلیمي بدلون زیان یوازې ولسونو ته رسیږي او نړۍوال باید د دې
موضوع د سیاسي کېدو پر ځای د تعامل لار غوره کړي.
ښاغلي عابد پر نړۍوالو غږ وکړ چې چاپېریالي موضوعات دې نه سیاسي
کوي او افغانستان ته دې په (COP-30) غونډه
د ګډون بلنه ورکړي.
ده همدا راز د مؤسسو له استازو وغوښتل هر څوک چې د
افغانستان په استازیتوب نړۍوالو غونډو کې ګډون کوي، باید د افغانانو ستونزې تر نړۍوالو
ورسوي.
د غونډې په لړ کې د متخصصینو له خوا د تېرو غونډو د اجرااتو
په هکله هر اړخیز معلوماتي پرزنټېشنونه وړاندې شول، ګډونوالو ازاد بحث وکړ، خپل
نظرونه او وړاندیزونه یې شریک کړل.