وروستی
د افغانستان پلاوی د لومړي ځل لپاره د شاهین د ساتنې نړیوال فورم کې د ګډون په موخه روسیې ته په سفر لاړ
١٤٤٧کال د ربیع الاول ٨مه/ولادیوستوک، روسیه
د چاپېریال ساتنې ملي ادارې عمومي رئیس مولوي مطیعالحق
خالص د یوه پلاوي په مشرۍ روسیې ته په سفر لاړ، څو د ښکار کوونکو مارغانو د ساتنې
او روزنې په تړاو د شاهین د ساتنې په دریم «نړیوال فورم» کې برخه واخلي. دا لومړی ځل
دی چې افغانستان ته په یاد نړیوال فورم کې د ګډون لپاره رسمي بلنه ورکړل شوې ده.
دغه نړیوال فورم د سپتمبر له ٣مې څخه تر ٦مې پورې د روسیې د
ولادیوستوک ښار په فار ایسټرن فدرال پوهنتون کې ترسره کېږي. یاد فورم د روسیې د
ولسمشر د لارښوونې پر بنسټ په ٢٠٢٣ کال کې د نادرو مارغانو د ساتنې او د ښکاري
مارغانو د نسل د ورکېدو د مخنیوي لپاره جوړ شوی دی.
په دې درېیم « نړیوال فورم» کې د ګڼو هېوادونو د چاپېریال
ساتنې ادارو استازي، د طبیعت د ساتنې نړیوالې اتحادیې غړي، د څېړنیزو مرکزونو
متخصصین او د ایکو-توریزم فعالان ګډون لري. د فورم د اجنډا مهم ټکي د نادرو ښکاري
مارغانو د ساتنې لارې چارې، د طبیعي نفوسو د بیا احیا اغېزمنې طریقې، د روزنې او بیا
رغاونې مرکزونو د تجربو شریکول، د غیر قانوني ښکار د مخنیوي تدابیر، د نوې ټیکنالوژۍ
کارونه، د عامه پوهاوي لوړول او د ایکو-توریزم وده.
سږکال به په دغه نړیوال فورم کې د «شاهین مارغانو نړیوال لیلام»
هم ترسره شي چې د هغې عواید به د شاهین کورنۍ د بیا راژوندي کولو او د ساتنې
مرکزونو، علمي څېړنو او اکولوژیکي ګرځندوی د پراختیا لپاره ځانګړي شي.
افغان پلاوی به په غونډه کې د افغانستان د نادرو مارغانو د
اوسني وضعیت، د هغوی د ساتنې لپاره د دولت او اړوندو ادارو د تدابیرو او راتلونکو
عملي پروګرامونو په اړه تفصیلي معلومات وړاندې کړي. د پلاوي ګډون به دا زمینه
برابره کړي چې افغانستان د نورو هېوادونو له بریالیو تجربو ګټه واخلي او په ځانګړې
توګه د شاهین د ساتنې او د هغوی د روزنې فرهنګ ته لا نور پام وکړي.
باید وویل شي چې د تېرو دوه فورمونو په پایله کې د روسیې، چین،
قرغزستان، قزاقستان، منګولیا، متحده عربي اماراتو، بحرین او قطر ترمنځ د «سپین شاهین»
د نفوس د ساتنې په اړه ګډه اعلامیه لاسلیک شوې وه.
شاهین د افغانستان د طبیعي شتمنیو له مهمو سمبولونو څخه دی
او په اسلامي نړۍ کې ځانګړی ارزښت لري. له همدې امله د افغانستان د پلاوي ګډون په
دغه نړیواله غونډه کې د هېواد لپاره یو مهم ډیپلوماتیک او چاپېریالي ګام ګڼل کېږي.