وروستی
د چاپېریال ساتنې ملي ادارې عمومي رئیس او ورسره پلاوي د لومړي ځل لپاره د شاهین د ساتنې نړیوال فورم کې ګډون او وینا وکړه
١٤٤٧کال د ربیع الاول ١٠مه/ولادیوستوک، روسیه
نن د روسیې په ولادیوستوک ښار کې د شاهین د ساتنې درېیم نړیوال
فورم په رسمي ډول پرانیستل شو. په دغه نړیواله غونډه کې د افغانستان پلاوي د چاپېریال
ساتنې ملي ادارې د عمومي رئیس مولوي مطیعالحق خالص په مشرۍ ګډون وکړ.
یاد فورم چې د سپتمبر له ۳مې تر ۶مې پورې د فار ایسټرن فدرال
پوهنتون کې ترسره کېږي، د روسیې د ولسمشر د لارښوونې پر بنسټ په ۲۰۲۳ کال کې د ښکار کوونکو نادرو
مارغانو د ساتنې او د نسل د ورکېدو د مخنیوي په موخه جوړ شوی دی.
په دې درېیم نړیوال فورم کې د ګڼو هېوادونو د چاپېریال ساتنې
ادارو استازي، د طبیعت د ساتنې نړیوالې اتحادیې غړي، د څېړنیزو مرکزونو متخصصین او
د ایکو-توریزم فعالان ګډون لري. د اجنډا مهم ټکي پکې د نادرو ښکار کوونکو مارغانو
د ساتنې لارې چارې، د طبیعي نفوسونو د بیا احیا میتودونه، د روزنې او بیا رغاونې
مرکزونو تجربې، د غیرقانوني ښکار د مخنیوي تدابیر، د نوې ټکنالوژۍ ګټې، عامه پوهاوی
او د ایکو-توریزم پراختیا شامل ده.
په دې غونډه کې د افغانستان د چاپېریال ساتنې ملي ادارې
عمومي رئيس د هېواد د نادرو مارغانو د اوسني وضعیت، د دولت او اړوندو ادارو د تدابیرو
او د راتلونکو عملي پروګرامونو په اړه وینا وکړه.
نوموړي
څرګنده کړه: افغانستان د ډېرو نادرو مارغانو طبیعي ټاټوبی دی. دغه مارغان زموږ د
فرهنګي ارزښتونو یوه برخه ده او په اسلامي نړۍ کې ځانګړی ځای لري. د هغوی ساتنه یوازې
چاپېریالي اړتیا نه، بلکې زموږ د دیني، فرهنګي او انساني مسؤلیت یوه مهمه برخه هم
ده.
ښاغلي خالص زیاته کړه: اسلامي امارت باور لري چې د طبیعي
شتمنیو ساتنه د نسلونو پر وړاندې زموږ د ټولو ګډ مسؤولیت دی، له همدې امله موږ په
دې برخه کې د سیمې او نړۍ له ټولو هېوادونو سره بشپړي همکارۍ ته چمتو یو.
عمومي رئيس د افغانستان د ملي ستراتیژیک پلان او د ژوند بڼو
ملي ستراتیژۍ (NBSAP) د جوړېدو
یادونه هم وکړه او وویل چې دا به د طبیعي شتمنیو د ساتنې، د ایکو-توریزم د ودې او
د چاپېریالي ارزښتونو د بېرته راژوندي کولو لپاره یو عملي چوکاټ برابر کړي.
مولوي مطیعالحق خالص په پای کې د نړیوالو ګډونوالو نه وغوښتل
چې د ښکار کوونکو مارغانو د ساتنې په برخه کې ګډ کار ته دوام ورکړي او د غیرقانوني
ښکار د مخنیوي لپاره عملي ګامونه پورته کړي.
سږکال په دغه نړیوال فورم کې د "شاهین مارغانو نړیوال
لیلام" هم ترسره کېږي چې عواید به یې د شاهین کورنۍ د ساتنې مرکزونو، علمي څېړنو
او د اکولوژیکي ګرځندوی د ودې لپاره ځانګړي شي.
د افغانستان د پلاوي ګډون په دغه نړیوال فورم کې د هېواد
لپاره یو ارزښتناک ډیپلوماتیک او چاپېریالي ګام ګڼل کېږي، ځکه شاهین د افغانستان د
طبیعي شتمنیو له مهمو سمبولونو څخه دی او په اسلامي نړۍ کې ځانګړی ارزښت لري.