وروستی
د چاپېریال ساتنې ملي ادارې پالیسي او مسلکي مرستیال د يوه پلاوي په مشرۍ د اندونیزیا هېواد ته رسمي سفر کړ
١٤٤٧کال د ربیع الاول ١٤مه/ جاکارتا
د چاپېریال ساتنې ملي ادارې پالیسي او مسلکي مرستیال ډاکټر
ملا زینالعابدین عابد د یوه پنځه کسیز پلاوي په مشرۍ اندونیزیا ته رسمي سفر وکړ.
د افغان پلاوي هرکلی د اندونیزیا د بهرنیو چارو وزارت او د افغانستان سفارت مسؤلینو
وکړ.
په دې سفر کې افغان پلاوي د اندونیزیا د اوبو او انرژۍ
وزارت، د اقلیمي بدلون او د طبیعي پېښو د مدیریت وزارت (BNPB) او ځايي ټولنې د
پراختیایي پروګرامونو له مسولینو سره وکتل.
ټاکل شوي پلاوي د اوبو سرچینو مدیریت، د اوبو لګولو اتومات
سیستمونه، د اقلیمي بدلون سره د مقاومت مرکزونه، د طبیعي پېښو پر وړاندې چمتووالی
او عاجل عملیاتي سیستمونه له نږدې وڅېړل.
همدارنګه افغان پلاوي د اندونیزیا د مالیې وزارت، د اسلامي
بانکدارۍ کوپراتیفونو او BMT (Baitul
Maal wa Tamwil) ادارو د فعالیتونو کتنه
وکړه او د ګډو تجربو د شریکولو زمینه او فرصت برابر شو.
همداراز اندونیزیا هېواد ته تللی پلاوي په خپلو ساحوي لیدنو
کې د Sabo ډیمونه، د پېښو د مخکینۍ خبرتیا سیستمونه او د کلیو د
مقاومت پروژې له نژدې وکتلې.
ورغلي پلاوي د تاریخي او مذهبي ځایونو کتنه هم وکړه، چې پکې
د Monas ملي یادګار او د استقلال جامع جومات شامل وو او د یاد هېواد
له علمای کرامو سره یې هم لیدنې وکړې.
په ملاقاتونو کې دواړو هېوادونو د همکاریو د پراختیا پر اهمیت
ټینګار وکړ او تجربې سره شریکي شوې.
د چاپېریال ساتنې ملي ادارې پالیسي او مسلکي مرستیال ډاکټر
ملا زینالعابدین عابد د دا ډول سفرونو ترسره کول خورا اغیزمن وبلل او زیاته یې کړه
چې دغه سفر افغان پلاوي ته د اقلیم بدلون، د اوبو مدیریت، د آفتونو پر وړاندې
چمتووالی، اسلامي بانکدارۍ او د ټولنې پر بنسټ پروژو کې د خلکو د رول په تړاو بشپړ
معلومات ترلاسه او یو ارزښتناک فرصت یې برابر کړ.
هغه وویل: «موږ هڅه کوو چې د اندونیزیا له لاسته راوړنو څخه
د اقلیمي بدلون او چاپېریال ساتنې په برخو کې ګټه واخلو او د دواړو هېوادونو ترمنځ
به د ګډو همکاریو پر بنسټ مشترک اقدامات ترسره شي»
