وروستی
د فعالیتونو د چاپېریالي وضعیت د ارزونې په هکله محصلینو ته عملي زدهکړه ورکړل شوه
۱۴۴۷ کال د ربیع الاول ۱۵/ ننګرهار
د ننګرهار ولایت د چاپېریال ساتنې ریاست له لوري د علمي زدهکړو
د پراختیا او د محصلینو د ظرفیت لوړونې په موخه د روښان پوهنتون محصلینو ته د چاپېریال
په برخه کې عملي روزنیز پروګرام ترسره کړ،
ترڅو هغوی له نږدې د چاپېریالي چارو عملي اړخونه وپیژني او مسلکي تجربې ترلاسه کړي.
په دې روزنیز پروګرام کې محصلین د جلال آباد ښار اړوند یو
شمېر تولیدي فابریکو ته بوتلل شول؛ ترڅو له نږدې د فابریکو د تولیدي بهیر، د چاپېریالي
اغېزو د ارزونې او د ککړتیا د کنټرول له میتودونو سره آشنا شي.
همداراز د چاپېریال ساتنې ریاست مسلکي کارکوونکو محصلینو ته
د ساحوي څارنې، تفتیش، چاپېریالي قوانینو، شرایطو، ارزونې او د عملي فعالیتونو اړوند
تفصیلي معلومات او عملي لارې چارې ور وښودلي.
د روښان
پوهنتون محصلینو د یادې علمي برنامې له ښه تنظیم او پلي کېدو مننه وکړه او ټینګار یې
وکړ چې دا ډول علمي او عملي همکاري نه یوازې د محصلینو عملي تجربې زیاتوي، بلکې د
علمي بنسټونو او دولتي ادارو ترمنځ اړیکې هم پیاوړې کوي.
د یادونې وړ ده، چې د ننګرهار ولایت د چاپېریال ساتنې ریاست
او د روښان پوهنتون ترمنځ د ګډو همکاریو تفاهملیک له وړاندې لاسلیک شوی؛ همداراز
له دې عملي برنامې وړاندې د ریاست له لوري محصلینو ته نظري زده کړې هم ورکړل شوې
دي چې له مخې یې د عامه پوهاوي، د ځنګلونو د ارزښت، د ګازونو د اغېزو، چاپېریال
قانون او چاپېریالي شرایطو په اړه مفصل معلومات ورکړل شوي دي.
د ننګرهار
د چاپېریال ساتنې ریاست وياړي چې محصلینو
ته عملي زده کړې برابروي، ترڅو د هغوی د عامه پوهاوي کچه لوړه شي او ځوانان له چاپېریالي
چارو سره مسلکي تجربه ترلاسه کړي.