وروستی
د چاپېریال ساتنې ادارې پلاوي د نورستان مرستیال والي سره وکتل
١٤٤٧کال
د ربیع الثاني ١٤مه/ نورستان
د چاپېریال ساتنې ملي ادارې پلاوی د رسمي سفر په ترڅ کې د
نورستان ولایت مرستیال والي مولوي فیصل مختار سره وکتل او د خپل سفر موخه یې شریکه
کړه.
پلاوي څرګنده کړه چې د چاپېریال ساتنې اداره د هېواد د طبیعي
شتمنیو، اوبو، هوا، ځنګلونو، څارویو او د انساني ژوند د چاپېریال د ساتنې او تنظیم
مسؤلیت لري او د همدې موخې لپاره یې د نورستان ولایت ته سفر کړی تر څو د ځنګلونو، څړځایونو
او وحشي ژوو د وضعیت له نږدې څارنه وکړي او د هغوی د بېځایه کېدو مخه ونیسي.
په مقابل کې مرستیال والي د پلاوي هرکلی وکړ او د نورستان د
جغرافیوي موقعیت، طبیعي سرچینو او د چاپېریال د ساتنې په برخه کې د ولایت هڅې تشریح
کړې. هغه وویل په نورستان کې د چاپېریال ساتنې ته ځانګړې پاملرنه شوې او د هرې سترې
پروژې پر مهال د طبیعت د خوندیتوب هڅې دوام لري.
مولوي فیصل مختار زیاته کړه چې نورستان د نادره ژوو او
نباتاتو د نسل د ساتنې خوندي سیمې لري او غوښتنه یې وکړه چې مرکزي اداره دي له نړیوالو
سازمانونو سره په همغږۍ دې ولایت ته ځانګړې پاملرنه وکړي.