وروستی
د چاپېریال ساتنې ملي ادارې لوري ولایتي رئیسانو ته د اقلیمي بدلون په تړاو پیل شوې څلور ورځنۍ ملي برنامه پای ته ورسېده
١٤٤٧کال د ربیع الثاني ٢٩مه/ کابل
د چاپېریال ساتنې ملي ادارې له لوري د رها موسسې په همکارۍ د اقلیمي بدلون په تړاو
پیل شوې څلور ورځنۍ روزنیزه ملي برنامه د یو لړ مراسمو په ترڅ کې پای ته ورسېده.
په دې مراسمو کې د چاپېریال ساتنې ملي ادارې عمومي رئیس مولوي مطیعالحق خالص، په
افغانستان کې د ملګرو ملتونو د خوړو او کرنې سازمان رئیس ښاغلي ریچارد، د ملګرو
ملتونو د پراختیایې سازمان استازو، د ملي او نړیوالو موسساتو مسئولینو، د رها
همکاري موسسې رهبرۍ او یو شمېر نورو امارتي او غیر امارتي مسوولینو ګډون کړی و.
د مراسمو په جریان کې د چاپېریال ساتنې ملي ادارې عمومي رئیس وویل: "اقلیمي
بدلون یوه نړیواله ستونزه ده چې زموږ هیواد هم له دې تاثیراتو څخه خوندي نه دی. موږ
باید د اقلیمي بدلون پر وړاندې خپلې هڅې پراخې کړو او د چاپېریال ساتنې اړوند په بیلابیلو
برخو کې عملي ګامونه پورته کړو."
نوموړي په خپلو خبرو کې ولایتي رئیسانو ته سپارښتنه وکړه چې د دې څلور ورځنۍ ملي
برنامې په ترڅ کې ترلاسه شوي موضوعات په عمل کې تطبیق کړي او هڅه وکړی چې در سپارل
شوي مسؤولیتونه په خورا دقت او ايماندارۍ سرته ورسوی.
د ملګرو ملتونو د خوړو او کرنې سازمان رئیس ښاغلي ریچارد په خپله وینا کې وویل:
"افغانستان د اقلیمي بدلون له امله په داسې شرایطو کې دی چې د زراعت، اوبو
سرچینو او نورو اساسي برخو ته یې جدي خطرونه متوجه دي. موږ باید د دې هېواد د طبیعي
سرچینو ساتنې لپاره ګډې هڅې وکړو."
د ملکي خدمتونو انستیتوت رئیس حافظ اسدالله هارون هم د اقلیمي بدلون په برخه کې د
پیاوړي ګډ همکارۍ اړتیا ته اشاره وکړه او څرګنده یې کړه چې یوازې د دولت نه بلکې د
ټولو نهادونو همکاري ضروري ده ترڅو د اقلیمي بدلون اغیزې کمي کړو.
همدارنګه په افغانستان کې د ملګرو ملتونو د پراختیایې سازمان
UNDP، ناروې کمېټې، ORD موسسې
استازو او د رها موسسې رئیس محمد یوسف حمیدیان هم خبري وکړې او د ګډونوالو پوښتنو
ته یې ځوابونه وویل.
د مراسمو په پای کې د څلور ورځنۍ ملي برنامې ګډونوالو ته تصدیق پاڼې ورکول شوې.
