وروستی
د واورین پړانګ د ساتنې په اړه سپين غر پوهنتون کې د عامه پوهاوي غونډه ترسره شوه
۱۴۴۷ کال
د جمادي الاول ۵مه/
ننګرهار
د ننګرهار ولایت د چاپېریال ساتنې ریاست له لوري د سپين غر
پوهنتون محصلینو، استادانو او اداري کارکوونکو لپاره د واورین پړانګ په اړه د عامه پوهاوي غونډه جوړه شوه.
په دې غونډه کې د سپين غر
پوهنتون مرستيال، د علمي او ادارې چارو مرستيالانو، استادانو، اداري کارمندانو او
محصلینو ګډون کړی و. د غونډې پر مهال د واورین پړانګ د له منځه تلو عمده ګواښونو،
د دې ژوي د بقا او ستونزو، او د وحشي ژوو د ساتنې په برخه کې د چاپېریال ساتنې ملي
ادارې د کړنو په اړه مفصل معلوماتي پریزنټیشنونه وړاندې شول.
د ننګرهار د چاپېریال ساتنې ریاست مسؤلینو ګډونوالو ته
معلومات ورکړل چې واورین پړانګ د افغانستان د غرنیو سیمو یو نادر، ښکلی او ارزښتناک
ژوی دی، چې نسل یې د ورکیدا له ګواښ سره مخ دی.
دغه ژوی د ښکار، ناقانونه قاچاق ،سوداګرۍ، اقلیم بدلون، جګړو
او د خلکو د عامه پوهاوي د ټیټې کچې له امله زیانمن شوی او د بقا په جدي خطر کې دی.
واورین پړانګ نه یوازې د
افغانستان د طبیعي میراث برخه ده، بلکې د ده شتون د چاپېریالي توازن او د غرنیو
اکوسیستمونو د ثبات لپاره ډېر مهم دی.
دغه ژوی د اقتصادي، تحقيقي،
طبي او ایکولوژيکي ارزښتونو له مخې ځانګړی اهمیت لري او د غرنیو سیمو د حیاتي تنوع
د ساتنې یو مهم عنصر ګڼل کېږي
دا ژوی یوازې په څو آسیایي هېوادونو
کې شته او افغانستان یې د استوګنې څخه دی. د دې ژوي ساتنه یوازې د دولتي ادارو
دنده نه ده، بلکې د هر وګړي اخلاقي او چاپېریالي مسؤلیت هم ګڼل کېږي.
په پای کې د ننګرهار چاپېریال ساتنې ریاست له ګډونوالو وغوښتل
چې د چاپېریال ساتنې او نادرو ژوو د خوندیتوب په اړه عامه پوهاوي ترسره کړي. د
پوهنتون مسؤلینو د یاد ریاست له کارمندانو مننه وکړه او ډاډ یې ورکړ چې د چاپېریالي
پوهاوي په پیاوړتیا کې به خپل رول ادا کوي