وروستی
" افغانستان د کاپ ۳۰ اقليمي ناستې پر لور " تر عنوان لاندې د چمتووالي تدابیري غونډه وشوه
۱۴۴۶ کال د جمادي الاول ۸مه/ کابل
د چاپېریال ساتنې ملي ادارې له لوري د اړيکو دفتر (TLO) په همکارۍ نن پنجشنبه د ۱۴۰۴کال د لړم په ۸مه نېټه کابل سټار هوټل کې
(افغانستان د کاپ ۳۰
اقليمي ناستې پر لور) تر عنوان لاندې د چمتووالي تدابیري غونډه وشوه.
په دې غونډه کې د چاپېریال ساتنې ملي ادارې عمومي رئيس مولوي
مطیعالحق خالص، د بېلابېلو امارتي ادارو مسوولینو، په افغانستان کې د ملګرو
ملتونو استازولۍ (يوناما) او اروپايي اتحاديې استازو، ملي او نړۍوالو مؤسسو مسوولینو،
د پوهنتونونو استادانو، متخصصينو او د رسنیو استازو ګډون کړی وو.
غونډه د قران عظیم الشان مبارکو اياتونو په تلاوت پيل شوه
ورپسې د (TLO) مؤسسې
مرستيال انجنير عبدالرحيم خرم ګډونوالو ته ښه راغلاست ووايه، د غونډې د جوړېدو په
هکله يې خبرې وکړې او هيله يې وښوده چې COP-30نړيوال
کنفرانس ته تلونکی افغان پلاوی به په پوره چمتووالي او همغږۍ سره په ياد کنفرانس کې
ګډون کوي.
د چاپېریال ساتنې ملي ادارې عمومي رئیس مولوي مطيع الحق خالص د افغانستان د چاپېريالي
وضعيت او اقليمي بدلون د اضرارو په تړاو خبرې وکړې.
نوموړي په خپلو خبرو کې وويل: افغانستان د نړۍوالو صنعتي هېوادونو د بې رويې
فعاليتونو له کبله د اقليمي بدلون څخه زيات متضرر شوی چې د ناڅاپي سېلابونو، بې
وخته ورښتونو، وچکالي، د تودوخې درجې لوړيدل او د داخلي مهاجرتونو زياتېدل يې ښکاره
بېلګې دي.
ښاغلي خالص وويل: موږ هڅه کوو چې په COP-30 کنفرانس
کې ګډون وکړو او خپل غږ تر نړۍوالو ورسوو، ده ياد کنفرانس ته د تلونکي پلاوي څخه
وغوښتل چې د افغانستان چاپيريالي ستونزې باید په مشترک، متحد او يوه واحد غږ تر نړۍوالو
ورسوي.
د چاپېریال ساتنې ملي ادارې عمومي رئیس وویل: نړۍوال بايد افغانستان د نړۍ برخه وګڼي،
چاپېريالي موضوعات دې نه سياسي کوي، له افغانستان سره دې امتيازي سلوک نه کوي او د
افغانانو حقوق دې ورکړي.
عمومي رئیس پر نړيوالو غږ وکړ چې د افغانستان ځنډول شوې چاپېريالي پروژې ژر تر ژره
له تعليق څخه وباسي؛ افغانستان بايد د اقليمي بدلون نړيوالو مالي صندوقونو ته
لاسرسی ومومي؛ په نړۍوالو چاپېريالي غونډو کې بايد افغانستان ته د ګډون بلنه ورکړل
شي او همداراز نړۍوال بايد د افغانانو چاپېريالي ستونزو ته د رسېدو په برخه کې خپل
مسووليت ادا کړي.
په افغانستان کې د اروپايي اتحاديې د سیاسي برخې مشر هم د اقليمي بدلون د زيانونو
په تړاو خبرې وکړې او په دې برخه کې يې د همکارۍ ډاډ ورکړ.
ورپسې د دې ادارې د اقليمي بدلون رئیس انجنیر روح الله امين کاپ ۳۰ غونډې ته د تلونکي پلاوي د
چمتووالي او مسووليتونو په تړاو هر اړخيز معلوماتي پرزنتيشن وړاندې کړ.
د غونډې په لړ کې د امارتي ادارو، نړيوالو او ملي مؤسسو او همداراز ځوانانو په
استازيتوب څو تنو متخصصينو په کاپ۳۰
غونډه کې د افغان پلاوي د ګډون د اهميت په هکله خبرې وکړې او ټينګار يې وکړ چې
افغانستان د اقليمي بدلون کنوانسيون د غړي په حيث مسلم حق لري چې په نړيوالو چاپېريالي
غونډو کې ګډون وکړي. دوی ټولو غوښتنه وکړه چې چاپېريالي موضوعات بايد سياسي نه شي،
ځکه د اقليمي بدلون له ناوړه اغېزو څخه ولسونه زيانمن کيږي.
په پای کې د ګډونوالو لهخوا هر اړخيز بحث تر سره شو او د يادې موضوع په تړاو يې
خپل وړانديزونه او نظرونه شریک کړل.