وروستی
هر ډول فعالیتونه د چاپېریالي اصولو پر تطبیق مکلف دي
۱۴۴۷ کال
د جمادي الاول ۲۶مه/
پکتیکا-خوست-میدان وردګ-کونړ
د پکتیکا، خوست، میدان وردګو او کونړ ولایتونو د چاپېریال
ساتنې ریاستونو نظارتي ټیمونو له لوري په فعالیتونو کې د چاپېریالي اصولو د تطبیق
په موخه د یو شمېر فعالیتونو د چاپېریالي وضعیت څارنه او ارزونه ترسره شوه.
د پکتیکا ولایت د چاپېریال ساتنې ریاست مسوولینو له لوري د
وازیخوا ولسوالۍ په مقام کې د مختلفو اصنافو (کلینیکونو، هوټلونو، قصابانو،
نانوايانو او حمامونو) له مالکينو سره غونډه وشوه؛ د چاپېریال قانون او مقرراتو په
هکله ورته پوهاوی ورکړل شو او سپارښتنې ورته وشوې چې خپل فعالیتونه د اصولو مطابق
ترسره کړي.
د
خوست ولایت د چاپېریال ساتنې ریاست مفتشینو له لوري د دولس سوه فاميليو اړوند سیمه
کې د ميوند په نوم د معدني اوبو تولیدي شرکت د فعالیتونو څارنه او ارزونه وشوه او
مسوولینو ته یې د فردي او محیطي حفظالصحې د ساتنې او ککړتیا د مخنیوي په هکله
ورته لازمې سپارښتنې وشوې.
د میدان وردګو ولایت نرخ ولسوالۍ کې د کرش پلانټونو شرکت د
ساحو څخه نظارت ترسره شو، د څارنې په لړ کې د یا فعالیت مسؤولینو ته د ککړتيا
راکمولو او مخنيوي په هکله لازمې سپارښتنې وشوې چې هغوی یې د عملي کولو ژمنې وکړې.
د کونړ ولایت د چاپېریال ساتنې رئیس ډاکټر محمد رحمن صابر په
مشرۍ نظارتي ټیم لوري د طبي زبالو د تنظيم او چاپېریال ساتنې په موخه اسعداباد ښار
کې د یوه کلینیک او مختلفو اصنافو د فعالیتونو د څرنګوالي څخه نظارت ترسره شو.
د نظارت په ترڅ کې د اصنافو مالکینو ته د چاپېریال قانون په
هکله معلومات ورکړل شول او غوښتنه ترې وشوه چې چاپېریال ساتنې
ته پاملرنه وکړي.