په ملي پلانونو او پالیسیو کې د اقلیمي بدلون اړوند موضوعاتو د ادغام په تړاو مشورتي غونډه جوړه شوه

۱۴۴۷ کال د جمادي الثاني ۶مه/ کابل
د چاپېریال ساتنې ملي ادارې عمومي رئیس مولوي مطیع الحق خالص په مشرۍ چې د اړوندو امارتي وزارتونو او ادارو استازو حضور درلود، نن پنج‌شنبه د ۱۴۰۴کال د لیندۍ په ۶مه نېټه د دې ادارې د بند امیر غونډو په تالار کې مشورتي غونډه وشوه.
غونډه د قرانکریم مبارکو ایتونو په تلاوت پیل شوه ورپسې د دې ادارې عمومي رئیس مولوي مطیع الحق خالص ګډونوالو ته ښه راغلاست ووایه او په خپلو خبرو کې یې وویل چې د اقلیمي بدلون اړوند موضوعاتو په تړاو څنګه کولی شو چې په ګډه قدمونه واخلو، زموږ د نننۍ غونډه موخه همدا ده چې اړوند امارتي وزارتونه او ادارې په خپلو لنډ مهاله او اوږدمهاله پلانونو او پالیسیو کې د اقلیمي بدلون اړوند موضوعات ادغام کړي.

ښاغلي خالص وویل: اقلیمي بدلون یوه نړۍواله موضوع ده او افغانستان یې د نورو هېوادونو په پرتله ډیر زیات اغېزمن کړی؛ ځکه زموږ هېواد کې د څو لسیزو جګړو له امله ډول ډول ممنوعه اسلحې کارول شوې دي چې چاپېریال یې ډیر زیات اغېزمن کړی او اوس چې اقلیمي بدلون راغلی؛ نو زموږ د اوبو، کرنې او مالدارۍ سکتورونه یې ډیر زیات اغېزمن کړي دي.
عمومي رئیس د اقلیمي بدلون او چاپېریالي موضوعاتو په هکله هر اړخیزه وینا وکړه او د امارتي وزارتونو او ادارو له استازو یې غوښتنه وکړه چې په خپلو پلانونو، پالیسیو او عمراني چارو کې د اقلیمي بدلون موضوعات په پام کې ونیسي.

نوموړي همداراز له ټولو امارتي ادارو او هېوادوالو غوښتنه وکړه چې د اقلیمي بدلون په برخه کې له نړۍوالو ګټورو تجربو کار واخلي او ټول په ګډه د وطن د ابادۍ او ښېرازۍ لپاره مټې را ونغاړي.
د غونډې په لړ کې د اقلیمي بدلون رئیس روح الله امین او کارپوهانو لخوا د اقلیمي بدلون اړوند موضوعاتو په تړاو هر اړخیز معلوماتي پرزنټشنونه وړاندې شول او له هر اړخیز بحث وروسته غونډه د دعایې په لوستلو سره پای ته ورسېده.

Nov 29, 2025