وروستی
د هېواد په یو شمېر ولایتونو کې چاپيريالي څارنې او ارزونې ترسره شوې
١٤٤٧کال د جمادي الثاني ٩مه/ ولایات
د چاپېریال ساتنې ملي ادارې اړوند ریاستونو د روانې اونۍ په
اوږدو کې په خوست، ارزګان، غزني او زابل ولایتونو کې د چاپېریالي وضعیت د ارزونې،
نظارت او د حفظالصحې او ککړتیا د مخنیوي په موخه پراخ فعالیتونه ترسره کړي دي.
په خوست ولایت کې د چاپېریال ساتنې ریاست د رئيس قاري شریف
الله مهاجر په مشرۍ د درېیمې ناحیې اړوند په تپې او منګلو سړک کې د درېیو بابه کیک
او کلچه جوړولو کارخونو چاپېریالي ارزونه وکړه. د یادو کارخانو د حفظالصحې، ککړتیا
د سرچینو او د کارکوونکو د شخصي حفظالصحې وضعیت وڅېړل شو. د ارزونې پر مهال ځینې
نیمګړتیاوې په ګوته شوې او مسؤلینو ته لازمې چاپېریالي سپارښتنې وشوې چې د سالم
چاپېریال د خوندي ساتلو لپاره یې رعایت اړین دی. د کارخانو مسؤلینو د یادو
رهنمودونو د تطبیق ډاډ ورکړ.
په ارزګان ولایت کې د ترینکوټ ښار اړوند ۸ د چرګانو فابریکو له مسؤلینو
سره د چاپېریالي اصولو د مراعات په اړه ځانګړې ناسته ترسره شوه. په دې ناسته کې د
حفظالصحې اړوند لازمې سپارښتنې وشوې او مسؤلینو ته د چاپېریالي معیارونو د تطبیق
اهمیت په ډاګه شو.
په غزني ولایت کې د ژوند چاپېریال ساتنې ریاست د نور خاتم
النبیین روغتون چاپېریالي څارنه او ارزونه وکړه. په ارزونه کې څرګنده شوه چې
روغتون د تېرو سپارښتنو د پلي کولو په برخه کې د پام وړ پرمختګ کړی، خو بیا هم
مسؤلینو ته د چاپېریال ساتنې قانون او مقرراتو په رڼا کې لارښوونې وشوې تر څو فعالیتونه
په بشپړ معیاري ډول پر مخ یوسي.
همدارنګه د زابل ولایت د چاپېریال ساتنې ریاست ګډ ټیم د قلات
ښار له شخصي معاینه خانو څخه د طبي زبالو د مدیریت او مخنیوي په موخه څارنه وکړه.
د لیدنې پر مهال مسؤلینو ته سپارښتنه وشوه چې د خطرناکو طبي زبالو د بیځایه غورځولو
څخه ډډه وکړي، ځکه چې دا کار د خلکو روغتیا او د ښار چاپېریال ته زیان رسوي. مسؤلینو
ژمنه وکړه چې له طرزالعمل سره سم به د طبي زبالو مدیریت کوي.
د چاپېریال ساتنې ملي اداره له ټولو صنعتکارانو، روغتيايي
مرکزونو او کاروباري بنسټونو څخه غوښتنه کوي چې د چاپېریالي قوانینو رعایت ته جدي
پاملرنه وکړي، د ککړتیا سرچینې کنټرول کړي او د خلکو د روغتیا ساتلو لپاره
مسؤلانه چلند ولري.