وروستی
د ملګرو ملتونو د اقلیمي بدلون کنوانسیون (UNFCCC) غړیو هېوادونو ۲۵مه غونډه پرانیستل شوه
د ملګرو ملتونو د اقلیمي بدلون کنوانسیون (UNFCCC) غړیو هېوادونو ۲۵مه غونډه، د یاد کنوانسیون د غړیو هېوادونو د ۲۷۰۰۰ تنو استازو په ګډون د ۲۰۱۹ کال د ډسمبر په ۲مه نېټه د هسپانیې په مادرید ښار کې رسماً پرانېستل شوه.
د دې غونډې موخه د پاریس تړون د موخو تطبیق او د پالیسي جوړوونکو، ملي او څو اړخیزه پلي کوونکو بنسټونو، د ملي بنسټونو پلي کوونکو، خصوصي سکټور او مدني ټولنو راټولول او د اقلیمي بدلون د ګواښونو لپاره د حل لارو چارو لټول دي.
د غونډې د پرانېستې پر مهال د ملګرو ملتونو (UN) اجرائیه رئیس ښاغلي انتونیو ګوتریش، اقلیمي بدلون د نړۍ لپاره یو ستر کړکیچ وباله او له پرمختللو هېوادونو یې غوښته وکړه چې له کم ودې هېوادونو سره دې مرستې وکړي.
د غونډې په لړ کې د اقلیمي بدلون بین الحکومتي پلاوي (IPCC) رئیس هم وینا وکړه او په اوسط ډول یې د سانتي ګراد په کچه د حرارت ۲ درجې ساتلو او ۱.5 درجو ته راکمولو باندې ټينګار وکړ. نوموړي له غړیو هېوادونو غوښتنه وکړه چې په ملي او نړیواله کچه دې لازم اقدامات ترسره کړي.
د یادولو وړ ده چې په دې غونډه کې د افغانستان اسلامي جمهوري دولت په استازیتوب د چاپېریال ساتنې ملي ادارې د پالیسۍ او نړیوالو اړیکو معین په مشرۍ لسو تنو استازو ګډون کړی دی.