وروستی
د هوا ککړتیا د مخنیوي کميسیون غونډه وکړه
د چاپېریال ساتنې ملي ادارې عمومي رئیس شاه زمان میوندي په مشرۍ د دې ادارې د مسلکي معین، انجنیر عزت الله صدیقي په حضور کې د هوا ککړتیا د مخنیوي کمیسیون د لېندۍ په ۱۶مه نېټه د بند امیر د غونډو په تالار کې ناسته وکړه.
ښاغلي میوندي د کابل ښار د هوا ککړتیا د راکمولو او مخنیوي پنځه کلن پلان په تړاو د وزارتونو او اړوندو ادارو د دندو او مکلفیتونه چې مشخص کړای شوي دي، ټینګار وکړ او د کمیسیون له غړیو یې وغوښتل چې هغه اقدامات ترسره کړي چې په ارګ کې د جلالتماب جمهور رئیس په مشرۍ فوق العاده غونډه کې دوی ته سپارښتنه شوې ده.
د اجنډا مطابق د چاپېریال ساتنې ملي ادارې مسلکي معین انجنیر عزت الله صدیقي د کابل ښار د هوا ککړتیا د راکمولو او مخنیوي پنځه کلن پلان د پلي کېدا په تړاو د اړوندو وزارتونو او ادارو د دندو او مکلفیتونو په اړه معلومات ورکړل او ویې ویل: چې هر ارګان باید د خپل کاري لید لوري مطابق خپلې کړنې او اقدامات ترسره کړي.
ښاغلي صدیقي همدا راز وویل: جلالتماب جمهور رئیس په مختلفو برخو لکه: د هوا ککړتیا او چاپېریالي وضعیت د معلوماتي سیسټم جوړول، د ماسک څخه د استفادې په اړه د عامه پوهاوي کمپاینونو په لاره اچول، د شنو ساحو پراختیا، د ترافیکي ګڼې ګوڼې څخه مخنیوی، د زړو ټایرونو او ډبرو سکرو د استفادې مخنیوی، د حمامونو، ریګریشنونو، خښتو بټیو او چاپېریالي مالي میکانیزمونو په اړه لازمې لارښوونې کړي چې د هوا ککړتیا د مخنیوي کمیسیون باید جدي اقدامات ترسره او جمهوري ریاست ته راپور ورکړي.
د کمیسیون غړو له هر اړخیز بحث وروسته پرېکړه وکړه چې د کورنیو چارو وزارت، چاپېریال ساتنې ملي ادارې، کابل ښاروالۍ، د نورم او ستندرد ملي ادارې او عامې روغتیا وزارت استازو په ګډون دې یوه کمېټه جوړه او څلور میاشتنی عملي پلان دې چمتو او راتلونکې غونډه کې دې وړاندې کړي؛ ترڅو د هغه پر اساس بېړني او عملي اقدامات پیل شي.
د یادولو وړ ده چې د جلالتماب جمهور رئیس په لارښوونه باید لس وروسته د هوا ککړتیا د مخنیوي کمیسیون په ارګ کې خپله غونډه جوړه او د کمیسیون د کړنو په اړه به راپور وړاندې کړي.