وروستی
د چاپېریال ساتنې ملي ادارې عمومي رئیس د رها موسسې له مرستیال او مل پلاوي سره وکتل
١٤٤٧کال د رمضانالمبارک ٢٩مه/ کابل
د چاپېریال ساتنې ملي ادارې عمومي رئیس الحاج مولوي مطیعالحق
خالص په خپل کاري دفتر کې د رها موسسې له مرستیال عزت الله صدیقي او ورسره پلاوي
سره وکتل.
په دې کتنه کې دواړو لورو د چاپېریال ساتنې په برخه کې پر
مهمو موضوعاتو هر اړخیز بحث او د نظرونو تبادله وکړه. په ځانګړي ډول د رها موسسې
په همکارۍ د افغانستان د چاپېریالي وضعیت د ارزونې راپور پر جوړولو خبرې وشوې چې
موخه یې د هېواد د چاپېریال اوسني وضعیت روښانه کول او د راتلونکو پالیسيو او پروګرامونو
لپاره دقیق معلومات برابرول دي.
همداراز په دې ناسته کې د چاپېریال ساتنې اړوند روانو پروژو
د پرمختګ ارزونه وشوه او د راتلونکو ګډو پروګرامونو او نوښتونو پر طرحه، همغږۍ او
پلي کېدو تفصیلي خبرې وشوې. دواړو لورو ټینګار وکړ چې د چاپېریال ساتنې په برخه کې
دوامدارې هڅې او ګډ کار کولای شي د اقلیم بدلون، ککړتیا او د طبیعي سرچینو د ناسمې
استفادې په څېر ننګونو ته اغېزمن ځواب وړاندې کړي.
ښاغلي خالص د چاپېریال ساتنې په برخه کې د نادولتي موسسو
رول مهم وباله او ویې ویل چې د دولتي او نادولتي بنسټونو ترمنځ پیاوړې همکاري د هېواد
د شنو ساحو د پراختیا، د هوا د ککړتیا د کمښت او د طبیعي سرچینو د ساتنې لپاره اړینه
ده.
بلخوا د رها موسسې مرستیال عزت الله صدیقي د چاپېریال ساتنې
ملي ادارې له رهبرۍ سره د همکارۍ پر دوام ټینګار وکړ او ژمنه یې وکړه چې د چاپېریالي
پروژو د پلي کېدو، څېړنو او عامه پوهاوي په برخو کې به خپلې هڅې لا ګړندۍ کړي.
د یادونې وړ ده چې د چاپېریال ساتنې په برخه کې د ورته
ناستو او همغږیو دوام کولی شي د هېواد د چاپېریال د وضعیت په ښه والي، د عامه
پوهاوي په لوړولو او د دوامدار پرمختګ د موخو په ترلاسه کولو کې مهم رول ولوبوي.