وروستی
د هوا د ککړتيا د مخنيوي عالي کميسيون غونډه ترسره شوه
د هوا ککړتيا د مخنيوي عالي کميسيون نوبتي غونډه د روان کال د ليندۍ د مياشتې په ۱۸مه نېټه د چاپېريالي ساتنې ملي ادارې سرپرست رئيس انجينير عزت الله صديقي په رياست او کابل ښاروال احمد ذکي سرفراز او د کميسيون غړو په ګډون د کابل ښاروالۍ د غونډو په تالار کې ترسره شوه.
د غونډې په پيل کې ښاغلي صديقي د څلور مياشتیني عملياتي پلان په هکله چې د موظفې کميټې له لوري ترتيب شوی، معلومات ورکړل او ويې ويل: دا پلان د هېواد ولسمشر د لارښوونو په رڼا کې ترتيب شوی او د جلسې له غړو غواړم ترڅو خپل نظريات د دې پلان د بشپړېدو په موخه وړاندې کړي، ترڅو د دې پلان عملي کارونه ژر پيل شي.
په دې ناسته کې د څلور مياشتیني عملياتي پلان له بحث او ارزونې څخه وروسته لاندې تصاميم ونيول شول:
- موظفه کميټه دې د عمل څلور مياشتينی پلان د جلسې د غړو د نظرياتو مطابق په درې برخو ( لوی فعاليتونو، متوسط فعاليتونو او کوچني فعاليتونو ) غني کړي او د تائيد په موخه دې د کميسيون غړو ته واستوي.
- د وزارتونو او دولتي ادارو د معينانو په کچه کميټه موظفه شوه ترڅو سبا سه شنبه د کابل ښار مختلفو سيمو کې د هغو سرچينو او منابعو څخه ليدنه او نظارت وکړي، چې د دود د توليد سبب ګرځي.
- پرېکړه وشوه چې د کميسيون غړي دې د لوړ پوړيزو ودانيو او ښارګوټو له مالکينو سره په کابل ښاورالۍ کې ناسته ترسره کړي.