کابل کې د وحشي ژویو او مرغانو د پېر او پلور له هټیو څارنه وشوه

۱۴۴۷ کال د ذوالقعدې۹نېټه/ کابل
د ښکار د مخنیوي کمپاین پر دوام د کابل ولایت د چاپېریال ساتنې ریاست سرپرست انجنیر احمد الله شېرزاد په مشرۍ نظارتٍي ټیم له لوري د ریاست الوزراء عالي مقام د ۱۴۱۴ ګڼه حکم د تطبیق په موخه د کابل ښار څلورمې ناحیې اړوند تهیه مسکن څلورلارې کې د وحشي حیواناتو او مرغانو د خرڅلاو له هټیو څخه نظارت ترسره شو  چې موخه یې د وحشي ژوو د ښکار، قاچاق ، پېر او پلور مخنیوی و.
د نظارت په ترڅ کې هټۍوالو ته د وحشي ژوو د ټولو ډولونو په ځانګړي ډول هغو انواعو چې د سره لېست برخه دي او نسل یې د له منځه تلو له ګواښ سره مخ دي ، د پېر او پلور د منع په اړه لازم معلومات او عامه پوهاوی ورکړل شو او همدارنګه له هټۍوالو لیکلې ژمنې واخیستل شوې چې د یادو ژوو له پېر او پلور څخه به ډډه کوي او د چاپېریال قانون او مقرراتو په پلي کولو کې به همکاري کوي.

سربېره پر دې د یاد هټیو مالکینو ته سپارښتنه وشوه چې که داسې حیوانات او مرغان وویني چې د له منځه تلو له ګواښ سره مخ وي او د ښکاریانو له لوري د خرڅلاو لپاره راوړل کېږي نو سمدستي دې د کابل ولایت د چاپېریال ساتنې ریاست له مسؤلینو سره اړیکه ونیسي؛ ترڅو له سرغړوونکو سره د اصولو او مقرراتو له مخې قانوني چلند وشي.

Apr 26, 2026