پکتیکا کې د اقلیمي بدلون او اوبو د مدیریت په تړاو یو ورځنی روزنیز پروګرام ترسره شو

۱۴۴۷ کال د ذوالقعدې۲۶نېټه/پکتیکا
د پکتیکا ولایت د چاپېريال ساتنې رياست له لوري د TLO موسسې په همکارۍ (د اقليم بدلون او اوبو مدیریت) تر عنوان لاندې يو ورځنی روزنیز پروګرام ترسره شو. دغه برنامه د ښرنې ښار زیتون هوټل د غونډو په تالار کې جوړه شوې وه چې پکې د امارتي ادارو استازو، مختلفو ولسوالیو ځوانانو او چاپېريالي رضاکارانو ګډون کړی وو.

یاده برنامه د قرآن کریم مبارکو آیتونو په تلاوت سره پیل شوه، ورپسې د پکتیکا ولایت د چاپېريال ساتنې رياست رئيس مولوي محمد سجاد خان وقاص د پرانیستې او ښه راغلاست وينا ترڅنګ ګډونوالو ته د چاپېريال ساتنې په هکله پراخ معلومات وړاندې کړل. ده زياته کړه چې په افغانستان کې په خاصه توګه پکتیکا ولایت اقليمي بدلون منفي اغیزو په زياته اندازه ځپلی ولایت دی او د يو منظم او سالم اقلیم نشتوالی د انسان روغتیا له جدي ستونزو سره مخ کوي، په ټولنه کې طبیعي سرچینو او په ټولو برخو کې منفي اغیزې ايجادوي. نوموړي زياته کړه چې چاپیریال ساتنه نه یوازې د يوې ادارې مسؤلیت دی بلکې د افغانستان د هر وګړي، بنسټونو او ادارو ګډ مسؤلیت دی.

 د روزنیز ورکشاپ په ترڅ کې د کابل پوهنتون استاد محترم سيد محمد سليمانخيل په افغانستان کې بلخصوص په پکتيکا ولايت کې د اقليم بدلون د ناوړه اغيزو او د اقليمي بدلونونو منفي اغیزو څخه د مخنیوي او د له‌منځه وړلو په هکله موثر پريزينټيشن وړاندې کړ،  همدارنګه د اوبو د ښه مدیریت، د اوبو د بې ځايه مصرف او د اوبو سپما په اړه یې معلومات وړاندې کړل، ترڅو څنګه وکولای شو چې پکتیکا ولایت کې موجوده چاپېريالي ستونزې لکه د اقليمي بدلون منفي اغیزې، د اوبو کمښت او د ځنګلونو د له منځه تللو څخه مخنیوی وشي.

همدارنګه جاويد اقبال د کابل پوهنتون د طبیعي سرچینو استاد د اوبو د ښه مدیریت،  په افغانستان کې د اوبو کمښت لاملونه، د اوبو سرچینې او سطحي اوبو مدیریت، د اوبو کلنۍ اندازه، د اوبو بحران، د اوبو د ککړتیا لاملونه ، د اوبو چيک ډيمونه او اهمیت يې، د باران د اوبو ذخيره کول او ګټه ترې اخیستل او په افغانستان کې د دوديزې ابیارۍ سيستم په هکله معلوماتي پريزينټيشنونه وړاندې شول.

د سيمينار په پای کې د ګډونوالو لخوا په ګروپي شکل سره د يادو موضوعاتو په هکله بحث، نظرونه، وړانديزونه او غوښتنې شریکې شوې؛ همداراز په اخر کې ټولو ګډونوالو ته تصدیق لیکونه او له کابل څخه راغلو ميلمنو ته د پکتیکا ولایت له دود سره سم د اعزاز پټکي ور پسر کړل شول.

May 13, 2026