وروستی
د افغانستان اسلامي امارت د چاپېریال ساتنې ادارې عمومي رئیس د یو پلاوي په مشرۍ په نړیوال ښاري فورم (WUF13) کې د ګډون په موخه آذربايجان ته په رسمي سفر روان شو
١٤٤٧کال د ذوالقعدې٢٨مه/ آذربايجان
د افغانستان اسلامي امارت د چاپېریال ساتنې ادارې عمومي رئیس
الحاج مولوي مطیعالحق خالص د یو پلاوي په مشرۍ، نن د آذربایجان هېواد پلازمېنې
باکو ته روان شو، ترڅو د ملګرو ملتونو د بشري مېشت ځایونو پروګرام (UN-Habitat) له لوري جوړېدونکي دیارلسم نړیوال
ښاري فورم (World Urban Forum – WUF13) کې
ګډون وکړي.
دغه نړیوال فورم چې د
“Housing the World: Safe and Resilient Cities and Communities” تر
عنوان لاندې ترسره کېږي، د نړۍ له مهمو نړیوالو ښاري او چاپېریالي غونډو څخه شمېرل
کېږي، چې پکې د بېلابېلو هېوادونو استازي، وزیران، ښاروالان، نړیوال بنسټونه، د
اقلیم بدلون متخصصین او د ښاري پراختیا اړوند ادارې ګډون کوي.
ټاکل شوې ده چې د افغانستان پلاوی په یاد فورم کې د اقلیمي
بدلون، ښاري چاپېریال ساتنې، دوامدارې پراختیا، د کثافاتو مدیریت، شنو ښارونو، د
هوا ککړتیا مخنیوي او د ښاري مقاومت په تړاو بېلابېلو ناستو او تخنیکي بحثونو کې ګډون
وکړي.
همداراز به د فورم په څنډه کې د افغانستان د چاپېریال ساتنې
ادارې عمومي رئیس او ورسره پلاوی د یو شمېر نړیوالو ادارو، تمویلوونکو بنسټونو او
د بېلابېلو هېوادونو له استازو سره د چاپېریالي همکاریو، تخنیکي مرستو او ګډو پروګرامونو
په اړه لیدنې او خبرې اترې هم ترسره کړي.
د چاپېریال ساتنې عمومي اداره د دغه ډول نړیوالو فورمونو ګډون
د افغانستان لپاره مهم بولي او باور لري چې دا به د نړیوالو تجربو د تبادلې، د اقلیمي
او چاپېریالي همکاریو د پراختیا او د هېواد د ښاري او چاپېریالي ستونزو د حل په
برخه کې ګټور تمام شي.
ټاکل شوې ده چې نړیوال ښاري فورم
(WUF13) د ۲۰۲۶
کال د مې میاشتې له ۱۷مې
څخه تر ۲۲مې
نېټې پورې د آذربایجان په باکو ښار کې ترسره شي.