وروستی
د اقلیم زرغون صندوق GCF ته د لاسرسي په اړه دوه ورځنی روزنیز ورکشاپ ترسره شو
د چاپېریال ساتنې ملي ادارې د ملګرو ملتونو د خوړو او کرنې سازمان (FAO) په همکارۍ، د اقلیم زرغون صندوق ته د لاسرسي د څرنګوالي، له یاد صندوق څخه د پروژو ترلاسه کولو او د کانسپټ نوټونو د چمتوکولو په اړه د روان کال د مرغومي په لومړۍ نېټه د دې ادارې د بند امیر د غونډو په تالار کې دوره ورځنی روزنیز ورکشاپ ترسره شو چې پکې د اړوندو دولتي ادارو استازو، د پوهنتون استادانو او د دې ادارې کارکوونکو ګډون کړی وو.
په پیل کې د اقليمي بدلون د مالي میکانیزمونو آمر، انجنیر غلام حسن امیري د دې ورکشاپ د جوړیدو په اړه خبرې وکړې او موخه یې د اړوندو دولتي ادارو د کارکوونکو د ظرفیت لوړول وبلل؛ ترڅو وکولای شي د اقلیم زرغون صندوق د معیارونو سره سم، خپلې طرحې جوړې او له یاد صندوق څخه پروژې ترلاسه کړي.
نوموړي وویل: د دې لپاره چې د اړوندو ادارو وړاندیز شوي کانسپټونه د اقلیم زرغون صندوق د تائید وړ وګرځې؛ نو ټولې ادارې مکلفې دي چې خپل کانسپټونه د یاد صندوق له معیارونو سره برابر چمتو کړي.
د ورکشاپ په لړ کې ګډونوالو ته د چاپېریال ساتنې ملي ادارې، د ملګرو ملتونو د خوړو او کرنې سازمان د متخصصینو لخوا د اقلیم زرغون صندوق د معرفۍ، د پروژو د طرحو د چمتو کولو او مډلونو، د سهم لرونکو د ونډې او نورو اړوندو موضوعاتو په تړاو هر اړخیز معلوماتي پرزنټېشنونه وړاندې شول.