وروستی
د هوا ککړتيا د راکمولو او مخنیوي لپاره حکومت بېړني اقدامات پيل کړل
د چاپېريال ساتنې ملي ادارې عمومي رئيس شاه زمان ميوندي په مشرۍ د هوا ککړتيا د مخنيوي عالي کمېسيون د روان کال د مرغومي په ۲مه نېټه غونډه وکړه چې پکې د دې ادارې مسلکي معين انجنيرعزت الله صديقي او د یاد کمېسيون غړیو ګډون کړی وو.
په پيل کې ښاغلي ميوندي د دې فوق العاده غونډې د رابللو موخه د کابل ښار د هوا ککړتيا د راکمولو په پار د حکومت پر بيړنيو اقداماتو بياکتنه وبلله، چې د ولسمشر له لوري يې لارښوونه شوې وه؛ نوموړي وويل: د جلالتمآب ولسمشر د لارښوونو مطابق اړونده ادارې مکلفې دي چې په لاندې څلورو کاري کمېټو کې د هوا ککړتيا د راکمولو په پار خپل عملي فعاليتونه پيل کړي:
)عملياتي کميټه، د نورم او ستندرد کميټه، د تقنين او عامه پوهاوي کميټه(
د چاپېريال ساتنې ملي ادارې عمومي رئيس له څلورو کميټو څخه په جدي ډول غوښتنه وکړه، چې د خپلو عملي فعاليتونو پر څرنګوالي کار وکړي او تر سبا پورې چې کوم اجراآت تمه ده ترسره شي، کميسيون ته دې په دې هکله راپور وړاندې کړي.
همدرانګه د چاپېريال ساتنې ملي ادارې مسلکي معين انجنير عزت الله صديقي د هوا ککړتيا د راکمولو په پار د حکومت د بېړنيو اقداماتو او د دې کميټو د فعاليتونو څرنګوالي په تړاو د غونډې ګډونوالو ته معلومات وړاندې کړل.
د ناستې غړیو د کابل ښار د هوا ککړتيا په موخه د حکومت د بېړنيو اقداماتو په هکله خپل نظرونه له يو او بل سره شريک کړل او پرېکړه یې وکړه چې څلور کميټې دې خپل اقدامات مشخص کړي او سر له سبا دې په جدي ډول خپل عملي فعاليتونه پيل کړي.
همدا راز د ناستې په لړ کې پرېکړه وشوه چې د هوا ککړتيا د مخنيوي عالي کمېسيون دې هره اونۍ د خپلو اقداماتو د پرمختګ په اړه د خبري کنفرانس له لارې خلکو ته معلومات ورکړي.