وروستی
د ضرب الاجل پای او د اصنافو د بندولو پیل
د چاپېریال ساتنې ملي ادارې مسلکي معین انجنیر عزت الله صدیقي په مشرۍ، له هواککړتیا سره د حکومت د جدي او عملي کړنو په درشل کې د روان کال د مرغومي په ۷مه نېټه د دې ادارې د کول حشمت خان د غونډو په تالار کې د کابل ښار د اصنافو (هوټلونو، حمامیانو، سقاوو، کلچه پخوونکو او قنادیو) له استازو سره غونډه ترسره شوه.
په دې غونډه کې د کابل ښاروالي د ښاري خدمتونو معینې آغلې مهتاب عالمي، د کورنیو چارو وزارت استازي الحاج شاه مقصود مستور، د کابل ښار ټولو امنیتي حوزو او ناحیو مسوولینو، د پیشه ورانو اتحادیې رئیس او کابل ښار مختلفو اصنافو استازو ګډون کړی وو.
د غونډې په پیل کې د چاپېریال ساتنې ملي ادارې مسلکي معین ګډونوالو ته ښه راغلاست ووایه او د دې غونډې موخه یې د کابل ښار د هوا ککړونکو منابعو له منځه وړل وبلل، نوموړي وویل: د هواککړتیا د مخنیوي عالي کمیسیون د لیندۍ په ۳۰مه نېټه د جلالتمآب ولسمشر په ریاست غونډه وکړه او د اړوندو ادارو مسوولینو ته یې قاطع امر وکړ چې له یادې نېټې وروسته دې په جدیت سره د ککړوونکو سرچینو مخنیوی وکړي.
ښاغلي صدیقي له ټولو کسبګرو وغوښتل چې سر له نننه دې د هوا ککړتیا د راکمولو او مخنیوي په برخه کې جدي تدابیر او اقدامات ترسره کړي که نه د پولیسو له جدي چلند سره به مخ شي.
د کابل ښاروالۍ معینې آغلې مهتاب عالمي هم وینا وکړه او زیاته یې کړه چې د کابل ښار اوسني وضعیت ته په کتو باید لاس په کار شو او په دې برخه کې یې د ټولو هېوادوالو همکاري اړینه وبلله.
همدا راز د کورنیو چارو وزارت استازي الحاج شاه مقصود مستور هم وینا وکړه او ژمنه یې وکړه چې د هوا ککړتیا د راکمولو او مخنیوي په برخه که به په ۲۴ساعته توګه په ټول کابل ښار کې د چاپېریال ساتنې ملي ادارې او کابل ښاروالۍ د چاپېریالي چارو له مفتشینو سره اوږه په اوږه ګرځي او سرغړوونکو سره به قانوني چلند کوي. نوموړي وویل د دې چارې د کابو کولو لپاره د (CRU) ځانګړې قطې، ۷۰ کسیزه ډله ګومارل شوې ده چې له قانون ماتوونکو سره به جدي عمل کوي.
د پیشه ورانو اتحادیې رئیس ښاغلي عمري هم وینا وکړه او په دې تړاو یې خپلې ستونزې له مسوولینو سره شریکې او د چاپېریال ساتنې په تړاو یې د هر اړخیزه همکارۍ ژمنه وکړه.
د غونډې په پای کې ښاغلي صدیقي د ګډونو پوښتنو ته ځوابونه ورکړل او ویې ویل: هر هغه څوک چې د هوا ککړتیا لامل ګرځي له قانوني چلند سره به مخ شي.
د یادولو وړ ده چې په دا وروستیو کې د کابل ښار هوا ډېره ککړه شوې ده چې د ډېرو نورو لاملونو سربېره د اصنافو فعالیت هم پکې د پام وړ ونډه لري، په همدې خاطر جلالتمآب ولسمشر په جدي توګه د کورنیو چارو وزارت ته امر کړی، هر هغه څوک چې د هوا ککړتیا لامل ګرځي؛ قانوني چلند دې ورسره وشي؛ نو ټولو هغو هېوادوالو ته چې د فابریکو، خښتو بټیو، ښارګوټو، لوړپوړیزو ودانیو، هوټلونو، نانوایانو او نورو لویو او کوچنیو فعالیتونو خاوندان دي، ژر ترژه دې جدي تدابیر ونیسي.