وروستی
د بې کیفیته تیلو پمپ سټېشنونو د بندېدو لړۍ پیل شوه
د تېرو اقداماتو په داوم نن د مرغومي په ۱۶مه نېټه، لوړپوړي دولتي پلاوي چې په ترکیب کې یې د چاپېریال ساتنې ملي ادارې مسلکي معین انجنیرعزت الله صدیقي، د ستندرد خپلواکې ادارې عمومي رئیس، د کابل ښاروالۍ د ښاري خدمتونو معینې، د نفت او ګازو ادارې استازي او امینه قوماندانۍ مسوولینو یو شمېر هغه پمپ سټېشنونه مهر ولاک کړل چې پخوا یې د تیلو سمپل اخیستل شوی او د لابراتوار د ازمایښت په نتیجه کې بې کیفته تشخیص شوي وو.
د چاپېریال ساتنې ملي ادارې مسلکي معین انجنیر عزت الله صدیقي خبریالانو ته وویل: د غه اقدامات چې د هوا ککړتیا د مخنیوي عالي کمیسیون په اجنډا کې وو، د هواککړتیا د منابعو د بندولو د لړۍ دوام دی چې په لړ کې یې نن هم د تیلو دوه پمپ سټېشنونه چې تیل یې بې کیفیته تشخیص شوي او پر چاپېریال ناوړه یېاغېزې ښندلې، مهر ولاک شول، دوی ته ۵ ورځې وخت ورکړل شوی چې د بې کیفیته تیلو له پلور څخه لاس واخلي؛ کنه نو له قانوني چلند سره به مخ شي.
ښاغلي صدیقي د ټولو دولتي او شخصي تصدیو او د تیلو پمپ سټېشنونو مالکینو ته خبرداری ورکړ چې خپل سونګ سیسټمونو ته دې معیاري فلترونه ولګوي او د بې کیفیته تیلو له پلور څخه دې ډډه وکړي، ده وویل: د جمهوري ریاست حکم پر بنسټ به د ټولو ناقانونه فعالیتونو سره جدي چلند کوي.
ښاغلي صدیقي وویل: د دې حکم پر بنسټ ټول ښارګوټي، لوړپوړیزه ودانۍ، حمامونه او د ودانیزو توکو کارخانې چې د ښار په داخل او اطراف کې دي، باید خپل سونګ سیسټمونو ته معیاري فلترونه ولګوي؛ ځکه د همدوی فعالیتونه د زهري دود د خپريدو او چاپېریال ککړتیا اصلي لامل دي؛ نو دا فعالیتونه به بندېږي او له ښار څخه به لېرې اېستل کیږي.
د یادولو وړ ده چې د چاپېریال ساتنې ملي ادارې مسلکي معین انجنیر عزت الله صدیقي په مشرۍ نظارتي پلاوي د مکروریانو د مرکز ګرمۍ له دستګاوو هم لیدنه وکړه او مسوولینو ته یې لارښوونه وکړه چې هغه اوبلن ګاز چې یادو دستګاوو کې سوځول کیږي؛ باید لابراتوار شي، راپور یې د هوا ککړتیا د مخنیوي عالي کمیسیون ته و استول شي او هم یې چاپېریال ته د زهري ګازو د خپرېدو په هکله موږ ته ډاډ راکړل شي.